ریاض سہیل بی بی سی اردو ڈاٹ کام، کراچی

	اکبر بگٹی محمد علی جناح کے ساتھ

کراچی میں متحدہ مجلس عمل کی جانب سے منعقدہ ایک جلسے کو خطاب کرتے ہوئے قومی اسمبلی میں قائد حزب اختلاف مولانا فضل الرحمان نے اعلان کیا کہ ایم ایم اے کی حکومت کے خلاف جاری تحریک میں نواب اکبر بگٹی کی آپریشن میں ہلاکت کے نقطے کو بھی شامل کیا گیا ہے۔

انہوں نے کہا کہ فوجی قیادت فیصلے کی صلاحیت سے محروم ہے، جس دن نواب اکبر بگٹی کا واقعہ پیش آیا اسی دن امریکہ کی جانب سے پاکستان کی نئی جغرافیائی حدود جاری کی گئیں ، ان دونوں کو دیکھا جائے تو یہ دونوں ایک دوسرے سے جڑے ہوئے ہیں۔ حکمرانوں کو صرف اپنی کرسی کی فکر ہے عوام سے انہیں کوئی دلچسپی نہیں ہے۔

جماعت اسلامی کے امیر قاضی حسین احمد نے ایم ایم اے کے جلسے کو خطاب کرتے ہوئے کہا کہ رات کی تاریکی میں ایک بڑا سانحہ رونما ہوا ہے، غار سے حقوق کی جنگ لڑنے والے کے خلاف آپریشن کیا گیا ہے۔ انہوں نے کہا کہ جن کو تنخواہ دشمن سے لڑنے کے لیے دی جاتی ہے،وہ اپنی نوکری کی خاطر حکم ماننے کے لیے تیار ہوگئے۔

قاضی کا کہنا تھا کہ سندھی، بلوچ پٹھان اسلام کی بنیاد پر اکٹھے ہیں اگر یہ بنیاد کمزور ہوگئی تو ان کے اکٹھے رہنے کا جواز نہیں رہتا ہے۔

اتحاد برائے بحالی جمہوریت کے سربراہ مخدوم امین فہیم نے ایک پریس کانفرنس میں بتایا کہ اے ارڈی کا پیر کو ہنگامی اجلاس طلب کیا گیا ہے، جس میں حکمت عملی طے کی جائے گی، مشترکہ اپوزیشن سے بھی رابطہ کیا جارہا ہے تاکہ ایک مشترکہ موقف اختیار کیا جاسکے۔

ایم ایم اے کے احتجاجی جلسے کو خطاب کرتے ہوئے انہوں نے کہا کہ ہماری تمام توانایاں اور ہمدردیاں بلوچ عوام کے ساتھ ہیں۔ یہ ایک بہت بڑا سانحہ ہے۔ تاریخ سے سبق سیکھنا چاہیئے جب اس طرح سے لوگوں کو مارا جاتا ہے تو اس کا بہت بڑا نقصان ہوتا ہے۔

انہوں نے کہا کہ نواب اکبر بگٹی پر حقوق مانگنے پر گولاباری کی گئی۔ اس کے بہت نقصاندہ نتائج نکلیں گے۔ اس وقت پاکستان انتہائی نازک موڑ پر آگیا ہے۔