اعجاز مہر بی بی سی اردو ڈاٹ کام، اسلام آباد

	ہنگامے کے بعد سپیکر نے اجلاس کی کارروائی جمعہ تک ملتوی کردی

مخدوم امین فہیم کی سربراہی میں حزب اختلاف کے کئی اراکین اپنی نشستیں چھوڑ کر سپیکر کے روسٹرم کے سامنے آگئے اور ان کا گھیراؤ کیے رکھا۔ سپیکر اجلاس کی کارروائی جاری رکھنے سے قاصر ہوگئے اور حزب اختلاف سے گزارش کی کہ وہ ان کے چیمبر میں آئیں اور معاملات طے کریں۔

سپیکر نے آدھے گھنٹے کے لیئے اجلاس کی کارروائی معطل کی لیکن حزب محالف کے نمائندے ان کے پاس نہیں گئے اور نیوز کانفرنس کی جس میں انہوں نے کہا کہ عدالتی فیصلے سے بدعنوانی کا بڑا سکینڈل سامنے آیا ہے جس میں بظاہر وزیراعظم شوکت عزیز براہ راست ملوث ہیں اور انہیں اپنی کابینہ سمیت مستعفی ہونا چاہیے۔

مخدوم امین فہیم نے کہا کہ سٹیل ملز کی نجکاری میں ایک فریق کو فائدہ دینے کے لیئے حکومت نے قانون اور آئین کی دھجیاں بکھیریں ہیں۔

نجکاری کمیشن کے سابق چئرمین نوید قمر نے کہا کہ وزیراعظم کابینہ کمیٹی کے خود چئرمین ہیں جس نے سٹیل ملز کی غیر قانونی نجکاری کی منظوری دی لہٰذا ان کے خلاف مقدمہ درج کرنا چاہیے۔

	مخدم امین فہیم نے کہا ہے کہ سٹیل ملز کی نجکاری کیس میں حکومت نے آئین کی دھجیاں بکھیریں ہیں

قبل ازیں متحدہ مجلس عمل کے سرکردہ رہنما لیاقت بلوچ نے نکتہ اعتراض پر کہا کہ سپریم کورٹ نے سٹیل ملز کی نجکاری میں بدعنوانیوں کی نشاندہی کے متعلق اہم نکات اٹھائے ہیں لہٰذا اس پر ایوان میں بحث کرائی جائے۔ پارلیمانی امور کے وزیر ڈاکٹر شیرافگن نیازی نے کہا کہ انہیں عدالت کا تفصیلی فیصلہ پڑھنے کے لیے دو روز کی مہلت دی جائے۔ جس پر حزب مخالف کے کئی اراکین اپنی نشستوں پر کھڑے ہوکر ڈیسک بجاتے رہے۔

انہوں نے پرزور انداز میں ’گو مشرف گو‘ اور’ گرتی ہوئی دیواروں کو ایک دھکا اور دو‘ کے نعرے لگائے۔ اس دوران ایوان میں شدید شور مچ گیا اور دیکھتے ہی دیکھتے اراکین سپیکر کے روسٹرم کے سامنے آ کر نعرے لگانے لگے۔

سپیکر نے بعد میں اجلاس کی کارروائی جمعہ کی صبح تک کے لیئے ملتوی کردی اور حزب مخالف سے کہا کہ وہ ان کے چیمبر میں ان سے مل کر طے کرلیں کہ کارروائی کیسے چلانی ہے تاکہ تعطل پیدا نہ ہو۔