ہارون رشید بی بی سی اردو ڈاٹ کام، پشاور

	قبائلی علاقوں میں پاکستانی فوج کو طالبان اور القاعدہ کی جانب سے مزاحمت کا سامنا ہے

چند منٹوں کے وقفے سے یہ دو دھماکے باجوڑ کے صدر مقام خار میں واقع لیویز مسجد کے باہر جوتے اتارنے کے مقام پر ہوئے۔

عینی شاہدین کے مطابق گھریلو ساخت کا پہلا ٹائم بم نو بجے کے قریب پھٹا۔ اس سے چند منٹ بعد تقریبا ایک گز کے فاصلے پر رکھے دوسرے ٹائم بم سے بھی دھماکہ ہوا۔

ان دھماکوں سے خار کے تحصیلدار امیر زمان اور دو سپاہی سہیل اور ممتاز خان زخمی ہوئے ہیں۔ ان کی حالت خطرے سے باہر بتائی جاتی ہے۔ کسی نے ابھی ان دھماکوں کی ذمہ داری قبول نہیں کی ہے۔

حکام کا کہنا ہے کہ وہ بم نصب کرنے والے افراد کی گرفتاری کی کوشش کر رہے ہیں تاہم آخری اطلاعات تک کوئی گرفتاری عمل میں نہیں آئی تھی۔

لیویز اہلکاروں کے رہائشی کواٹرز کے درمیان قائم اس مسجد کا یہ دروازہ بعد میں حکام نے بند کر دیا اور نمازی متبادل راستے سے نماز ادا کرنے آئے۔

مقامی قبائلیوں کا کہنا ہے کہ دھماکوں کے لیئے رات کا یہ وقت اس لیئے چنا گیا کیونکہ اس وقت اکثر لیویز کے لوگ ہی نماز ادا کرنے آتے ہیں اور عام لوگوں کی تعداد کم ہوتی ہے۔

باجوڑ میں گزشتہ ماہ القاعدہ کے ایک اہم رکن ابو مروان السوری کی لیویز کی ایک چوکی پر تصادم میں ہلاکت کے بعد سے پرتشدد کارروائیوں میں اضافہ ہوا ہے۔

اس سے قبل اس سال جنوری میں القاعدہ کے اہم رہنماؤں کی ڈمہ ڈولہ گاؤں میں موجودگی کی اطلاع پر امریکی بمباری سے تیرہ افراد ہلاک ہوئے تھے۔