ہارون رشید بی بی سی اردو ڈاٹ کام، پشاور

	باجوڑ ایجنسی کے گاؤں ڈمہ ڈولا پر حملے کے بعد ملک بھر میں احتجاج ہوا

یہ الزام انہوں نے پیر کے روز پشاور میں ایک اخباری کانفرنس میں لگایا۔

قبائلی علاقے باجوڑ ایجنسی میں گزشتہ جمعے کے روز امریکی بمباری سے ہوئی ہلاکتوں پر جماعت اسلامی نے احتجاج کا سلسلہ جاری رکھا ہوا ہے۔ باجوڑ اور پورے ملک میں احتجاجی مظاہروں کے بعد اب اس نے اخباری کانفرنس کے ذریعے حکومت پاکستان کو تنقید کا نشانہ بنایا ہے۔

جماعت اسلامی کے باجوڑ سے رکن قومی اسمبلی صاحبزادہ ہارون رشید نے پشاور میں اس کانفرنس میں الزام لگایا کہ حکومت پاکستان کو اس کارروائی کی خبر تھی تاہم ان ہلاکتوں کا جواز ایمن الظواہری کی موجودگی کو ثابت کرکے اس پر اب پردہ ڈالنے کی کوشش کی جا رہی ہے۔

انہوں نے کہا کہ حکومت کی اجازت کے بغیر کسی کی مجال نہیں ہوسکتی اس علاقے میں کارروائی کرے۔ انہوں نے مطالبہ کیا کہ اپنے شہریوں کو تحفظ کی فراہمی میں ناکامی اور اپنی غلطی کا اعتراف کرتے ہوئے مشرف حکومت کو مستعفی ہوجانا چاہیے۔

اس موقع پر جماعت اسلامی کے صوبائی جنرل سیکٹری مشتاق احمد نے شکایت کی کہ صدر نے ابھی تک اس واقعے کی باقاعدہ کوئی مذمت بھی نہیں کی ہے۔

جماعت اسلامی نے اس واقعے کے خلاف اپنا احتجاج جاری رکھنے کا اعلان کرتے ہوئے بیس جنوری کو دوبارہ مظاہرہ منعقد کرنے کا اعلان بھی کیا۔

یاد رہے کہ حکومت پاکستان نے بھی اس واقعے پر امریکی حکام سے احتجاج کیا ہے تاہم مبصرین کے خیال سے اس سے مقامی قبائل کی تسلی نہیں ہوئی ہے۔

کئی روز گزر جانے کے باجود ڈمہ ڈولا کے متاثرہ لوگوں سے سرکاری سطح پر اظہار ہمدری میں تاخیر مقامی افراد کے غم و غصے میں اضافے کا سبب بن رہی ہے۔