عزیزاللہ خان بی بی سی اردو ڈاٹ کام کوئٹہ

	’غیر آئینی اور غیر قانونی حکومت کی کارروائیاں غیر آئینی اور غیر قانونی ہیں‘

وکلاء نے اپنی تقریروں میں کہا ہے کہ ملک میں جمہوریت کے قیام کے لیے کوششیں ناگزیر ہو گئی ہیں۔

آج کوئٹہ میں پاکستان بار کونسل کے زیر انتظام اس کنونشن میں ملک کے چاروں صوبوں سے وکلاء نے شرکت کی ہے جبکہ کونسل کے نائب صدر علی احمد کرد نے کہا ہے کہ آج صوبہ بلوچستان میں وکلاء نے عدالتوں کا بائیکاٹ کیا ہے۔

علی احمد کرد نے کنونشن کے بعد بی بی سی کو بتایا ہے کہ اس وقت ملک میں غیر آئینی اور غیر قانونی حکومت قائم ہے لہذا ایسی حکومت کی کارروائیاں غیر آئینی اور غیر قانونی ہیں۔

وکلاء نے بلوچستان اور قبائلی علاقوں میں فوجی کارروائی بند کرنے کا مطالبہ کیا ہے۔ اس موقع پر ساجد ترین ایڈووکیٹ نے کہا ہے کہ بلوچستان میں بے یقینی کی صورتحال پائی جاتی ہے۔ انہوں نے کہا کہ کنونشن میں اس بات پر زور دیا گیا کہ صوبہ پنجاب کے لوگ اس وقت اہم کردار ادا کر سکتے ہیں۔

علی احمد کرد نے کہا ہے کہ اب دس جون کو لاہور میں کنونشن ہوگا جس میں پورے پاکستان سے وکیل آئیں گے اور اس روز پورے پاکستان میں وکیل عدالتوں کا بائیکاٹ کریں گے۔