دلاور خان وزیر ڈیرہ اسمعیل خان

	طالبان نے پشاور سے اخبار لے کر آنے والی گاڑی روک کر اخبارات کے تمام بنڈل نذر آتش کر دئیے (فائل فوٹو)

مقامی طالبان نے میر علی کے مرکزی چوک میں صبح آٹھ بجے کے قریب اردو اور انگریزی زبان میں شائع ہونے والے تمام اخبارات کی کاپیاں جلا دیں۔

طالبان کے کمانڈر صادق نور کے حامیوں نے میر علی کے لوگوں سے کہا کہ طالبان کو اخبارات میں ’شر پسندوں‘ اور ’دہشت گردوں‘ لکھا جا رہا ہے۔ انہوں نے کہا کہ جو اخبارات انہیں شر پسند اور دہشت گرد لکھنے سے گریز نہیں کریں گے ان اخبارات کے خلاف بھی کارروائی کی جائے گی۔

اس سے قبل اتوار اور پیر کی درمیانی شب جنوبی وزیرستان کے علاقے شکئی کے قریب خیمرنگ میں ایک فوجی چوکی پر راکٹوں سے حملہ کیا گیا۔ اس کے جواب میں فوج نے بھی کئی جگہوں پر توپوں اور مارٹر گن سے گولے داغے۔ اس میں لوت خان نامی ایک مذاحمتکار ہلاک ہوئے ہیں۔

تاہم اس کارروائی میں کسی قسم کے جانی نقصان ہونے کی کوئی اطلاع موصول نہیں ہوئی ہے۔

دو روز قبل مقامی طالبان کمانڈر صادق نور کے ترجمان مولانا طارق جمیل نے اعلان کیا تھا کہ قبائلی علاقوں میں سرکاری اہلکاروں، فوجیوں یا خاصہ داروں کو دیکھتے ہی گولی مار دی جائے گی۔

مولانا طارق جمیل کے اعلان کے بعد اتوار کی رات کو جنوبی وزیرستان میں فوجی چوکی پر یہ پہلا حملہ تھا۔