عزیزاللہ خان بی بی سی اردو ڈاٹ کام، کوئٹہ

	بلوچستان میں فوجی جوان ایک کارروائی کے دوران (فائل فوٹو)

چار بلوچ قوم پرست جماعتوں کا اجلاس آج سوموار کے روز ایم پی اے ہاسٹل میں منعقد ہوا جس میں بلوچستان نیشنل پارٹی مینگل گروپ جمہوری وطن پارٹی اور نیشنل پارٹی کے قائدین نے شرکت کی جبکہ حق توار کا کوئی نمائندہ اس اجلاس میں شامل نہیں تھا۔

جمہوری وطن پارٹی کے جنرل سیکرٹری آغا شاہد بگٹی نے بی بی سی کو بتایا ہے کہ اجلاس میں فیصلہ کیا گیا ہے کہ بدھ کے روز یوم سیاہ منایا جائے گا اور اسی روز پریس کلب کے سامنے احتجاجی مظاہرہ کیا جائے گا۔ انھوں نے کہا ہے کہ اجلاس میں یہ فیصلہ بھی کیا گیا ہے دیگر تمام سیاسی جماعتوں سے رابطہ کیا جائے گا اور بدھ کے روز شام کے وقت اجلاس ہوگا جس میں دیگر سیاسی جماعتوں کی حمایت طلب کی جائے گی۔

انھوں نے کہا ہے کہ اس کے لیے ایک کمیٹی قائم کی گئی ہے جو دیگر سیاسی جماعتوں کے قائدین سے رابطہ کرے گی۔ انھوں نے کہا ہے کہ دیگر جماعتوں میں حکمرا ن مسلم لیگ اور مجلس عمل شامل نہیں ہے۔ انھوں نے کہا ہے کہ دیگر جماعتوں میں پاکستان پیپلز پارٹی پشتونخواہ ملی عوامی پارٹی مسلم لیگ نواز عوامی نیشنل پارٹی وغیرہ شا مل ہیں۔

بلوچستان میں اس وقت حکمران مسلم لیگ اور متحدہ مجلس عمل کی مخلوط حکومت قائم ہے۔