عزیزاللہ خان بی بی سی اردو ڈاٹ کام، کوئٹہ

	بلوچستان میں فوجی جوان ایک کارروائی کے دوران (فائل فوٹو)

وفاقی وزیر داخلہ آفتاب احمد خان شیر پاؤ پیر کوکوئٹہ پہنچے ہیں جہاں انہوں نے ایک اعلی سطحی اجلاس میں شرکت کی ہے۔

یاد رہے کہ گزشتہ روز آفتاب شیرپاؤ نے کسی فوجی آپریشن کی تردید کی تھی جبکہ فوج کے ترجمان میجر جنرل شوکت سلطان نے کہا تھا کہ راکٹ باری اور بم دھماکوں میں ملوث افراد کے خلاف کارروائی شروع کی گئی ہے۔

ادھر کوہلو سے اطلاعات کے مطابق فورسز نے تلی جندران کاہان اور پیر محمود شاہ کے علاقوں پر بمباری کی ہے۔

ہلاکتوں اور زخمی ہونے والے افراد کے بارے میں متضاد اطلاعات موصول ہو رہی ہیں لیکن سرکاری سطح پر اس کی تصدیق نہیں کی جا رہی۔ کوہلو سے مقامی لوگوں نے بتایا ہے کہ درجنوں افراد ہلاک اور زخمی ہوئے ہیں جبکہ چالیس کے لگ بھگ افراد کو گرفتار بھی کیا گیا ہے۔

بلوچستان نیشنل پارٹی کے لیڈر حبیب جالب نے بتایا ہے کہ کوہلو کے ایک علاقے میں بمباری کے بعد سے پچاس افراد غائب ہیں اب یہ معلوم نہیں ہے کہ وہ لوگ ہلاک ہیں یہ کہیں فرار ہو گئے ہیں۔

	وفاقی وزیر داخلہ آفتاب احمد خان شیر پاؤ پیر کوکوئٹہ پہنچے ہیں

کوہلو سوئی اور سبی ہسپتالوں میں کوئی زخمی یا لاش ابھی تک نہیں لائی گئی جبکہ ادھر بارکھان کے ہسپتال سے رابطہ نہیں ہو رہا ہے۔

کوہلو کے سابق ناظم نصیب اللہ نے بتایا ہے کہ نا معلوم افراد نے پیرکو علی الصبح چھ راکٹ داغے ہیں لیکن اس میں کوئی نقصان نہیں ہوا ہے۔ یہ راکٹ ایف سی کیمپ کے قریب گرے ہیں۔

ایک سرکاری اہلکار نے نام نہ بتانے کی شرط پر بتایا کہ سکیورٹی فورسز نے مختلف سمتوں سے حرکت شروع کی ہے۔ فضائی حملوں کے علاوہ فورسز ڈیرہ بگٹی سبی اور کوہلو کے اطراف سے کاہان کے علاقے کی طرف بڑھ رہے ہیں۔

بعض اطلاعات کے مطابق بھمبھور کے علاقے میں فورسز اور قبائل کے مابین جھڑپ ہوئی ہے۔

ادھر ڈیرہ بگٹی میں وقفے وقفے سے فائرنگ کی اطلاعات موصول ہو ئی ہیں جہاں کم سے کم تین افراد زخمی ہوئے ہیں۔ یہ اطلاعات بھی ہیں کہ ڈیرہ بگٹی اور دیگر قریبی علاقوں سے لوگوں نے نقل مکانی شروع کر دی ہے۔

ڈیرہ بگٹی سے نواب اکبر بگٹی نے گزشتہ دنوں کئی مرتبہ کہا ہے کہ حکومت ایک اور فوجی کارروائی کی تیاری کر رہی ہے۔