مبشر زیدی بی بی سی اردو ڈاٹ کام، اسلام آباد

	فارم کی ساڑھے تین ہزار مرغیوں کو تلف کر دیا گیا۔(فائل فوٹو)

اس پولٹری فارم کی تمام مرغیوں کو بھی ہلاک کر دیا گیا ہے۔

محکمہ لائیو سٹاک کے کمشنر محمد افضل نے بی بی سی کو بتایا کہ نیشنل ایگریکلچرل لیبارٹری اسلام آباد میں کیئے گئے ٹیسٹ کے بعد اس پولٹری فارم میں ایچ فائیو این ون وائرس کا انکشاف اس ماہ کی چودہ تاریخ کو ہوا تھا جس کے بعد پندرہ تاریخ کو اس فارم کی ساڑھے تین ہزار مرغیوں کو تلف کر دیا گیا۔

تاہم انہوں نے کہا کہ ابھی تک پاکستان میں کسی انسان میں برڈ فلو پائے جانے کی کوئی اطلاع موصول نہیں ہوئی ہے۔

اس سے قبل گذشتہ ماہ برطانوی لیبارٹری نے پاکستان کے صوبہ سرحد کے دو شہروں ایبٹ آباد اور چارسدہ کے دو فارموں میں برڈ فلو وائرس کی تصدیق کردی تھی۔

پولٹری انڈسٹری کے نمائندوں کا کہنا ہے برڈ فلو کے خدشے سے اس صنعت کو سات سے دس کروڑ روپے روزانہ کا نقصان ہو رہا ہے۔

پاکستان میں پولٹری ایسوسی ایشن نے اس وائرس کی موجودگی کے بعد اخبارات میں اشتہار شائع کرائے تھے کہ مرغیاں کھانے سے کوئی خطرہ نہیں۔ اس بارے میں حکومت کے متعلقہ اداروں سے بھی انہوں نے بیانات دلوائے تھے۔