ریاض سہیل بی بی سی اردو ڈاٹ کام، کراچی

	کچکول علی اور حئی بلوچ نے اختر مینگل کے گھر کے محاصرے کی مذمت کی ہے

اختر مینگل نے اپنے گھر سے ٹیلیفون پر بی بی سی سے بات کرتے ہوئے بتایا
کہ سندھ حکومت سے مذاکرات کی ناکامی کے بعد ان کے گھر کا پانی بھی بند کردیا گیا ہے جبکہ اخبارات کی ترسیل پر بھی پابندی عائد کردی گئی ہے۔

انہوں نے بتایا کہ ’میں نے باہر نکل کر کہا کہ اگر میرے خلاف وارنٹ ہیں تو میں پولیس موبائل میں بیٹھنے کے لئے تیار ہوں۔ اگر میں نظر بند ہوں تو میرے گھر کو سب جیل قرار دیا جائے‘۔

اختر مینگل نے بتایا کہ ’پولیس کا کہنا ہے کہ ہمیں کوئی آرڈر نہیں۔ مجھے یہ پتا نہیں چلتا کہ حکومت کون چلا رہا ہے ۔خفیہ اداروں نے صوبائی حکومت اور پولیس کو شیلڈ کی طرح سامنے کیا ہوا ہے‘۔

گھر کے باہر پولیس کی ایک بڑی نفری کے بارے میں ان کا کہنا تھا کہ پولیس کو دیکھ کر لگتا ہے کہ ’میں بھی دہشتگرد ہوں‘۔

جب ان سے سوال کیا گیا کہ حکومت سے کیا دوبارہ مذاکرات ہوسکتے ہیں تو ان کا کہنا تھا کہ ’کس کس سے مذاکرات کیئے جائیں، جن لوگوں کو بااختیار ہونا چاہئے تھا وہ بے اختیار ہیں جبکہ جو طاقتور اداروں کے لوگ ہیں وہ ہمیشہ بندوق کی زبان سمجھتے ہیں‘۔

	اختر مینگل کے گھر کے محاصرے پر احتجاج

دوسری جانب سندھ اور بلوچستان اسمبلی میں اپوزیشن رہنما نثار کھوڑو، کچکول علی اور نیشنل پارٹی کے سربراھ حئی بلوچ نے ایک مشترکہ پریس کانفرنس میں اختر مینگل کے گھر کے محاصرے کی مذمت کی ہے۔

نثار کھوڑو کا کہنا تھا کہ بلوچستان کی صورتحال کو اب سندھ کے کچھ علاقوں تک پھیلایا جا رہا ہے جس پر اسمبلی میں حکومت سے سوال طلب کیا جائے گا۔
انہوں نے بتایا کہ بلوچستان کی صورتحال اور موجود حالات پر چاروں صوبائی اسمبلی کے اپوزیشن رہنماؤں کا مشترکہ اجلاس طلب کیا جائے گا جس میں حکمت عملی طے کی جائے گی۔

بلوچستان اسمبلی میں اپوزیشن رہنما کچکول علی نے بتایا کہ موجودہ حالات کے خلاف احتجاجاً مستتعفی ہونے پر اپوزیشن اراکین متفق ہیں اب فیصلہ سیاسی جماعتوں کے رہنماؤں نے کرنا ہے۔

نیشنل پارٹی کے سربراہ سابق سینیٹر حئی بلوچ کا کہنا ہے کہ بلوچستان میں منصوبہ بندی کے تحت حالات خراب کیئے گئے ہیں۔ ان کے مطابق کوہلو میں راکٹ حملے کو جواز بنا کر بلوچستان کے عوام کے خلاف جارحانہ جنگ شروع کی گئی ہے۔

انہوں نے کہا، ’جس حکومت کی اپنی کوئی قانونی حیثیت نہ ہو،جو خود غاصب ہے اس کی کیا رٹ ہوسکتی ہے‘۔