ریاض سہیل بی بی سی اردو ڈاٹ کام، کراچی

	کسی کے منہ پر نہیں لکھا ہوتا کہ وہ ایجنسی کے آدمی ہیں: اختر مینگل

اختر مینگل کے گھر کا محاصرہ: تصاویر

اختر مینگل کے گھر کے محاصرے پر احتجاج

سردار اختر مینگل اور ان کے ملازمین کے خلاف درخشان تھانے پر درج مقدمہ نمبر ایک سو ستر میں ان کے خلاف سرکاری کام میں مداخلت کا الزام بھی عائد کیا گیا ہے ۔

	سڑک پر ٹرالر لگا کر راستہ بلاک کیا گیا تھا

ایف آئی آر کے مطابق اس دوران لال رنگ کی جیپ میں سوار سردار مینگل بھی وہاں پہنچ گئے اور انہوں نے کہا کہ یہ فوج کے لوگ ہیں ان کو مارو۔ جس کے بعد مدعی کو تشدد کا نشانہ بنایا گیا۔

سردار عطااللہ مینگل نے بی بی سی کو بتایا کہ ڈی آئی جی نے اختر مینگل کو بتایا ہے کہ ان کے ہتھیاروں کے لائسنس رد کیے گئے ہیں۔

سردار عطااللہ کے مطابق اختر مینگل نے پولیس کو کہا ہے کہ وہ گرفتاریاں درج کریں کیونکہ ایجنسیاں لوگوں کو گم کردیتی ہے اور ان کی زندگی کو خطرہ لاحق ہوسکتا ہے۔ ان کے مطابق ان کے بیٹے کے وکیل کو بھی ان کے گھر نہیں آنے دیا گیا۔

دوسری جانب کراچی کے بلوچ آبادی والے علاقوں میں نامعلوم افراد نے فائرنگ کی اور گاڑیوں کو نذر آتش کیا ہے۔ لیاری میں فائرنگ کے بعد کاروبار بند ہوگیا جبکہ کلاکوٹ اور ڈگری کالج کے علاقے میں کے ای ایس سی کی ایک گاڑی اور ایک موٹر سائیکل کو نذر آتش کیا گیا ہے۔

	اختر مینگل کے باہر پولیس کا پہرا

اس سے قبل سردار مینگل کے ملازمین نے بدھ کی صبح دو ’مشکوک‘ لوگوں کو پکڑا تھا جس کے بعد سکیورٹی فورسز نےگھر کوگھیرے میں لے لیا۔

محاصرہ کے دوران اختر مینگل کے پڑوس میں واقع گھروں کی چھتوں پر بھی پولیس اہلکار تعینات تھے جبکہ اختر مینگل اپنی گیلری میں ٹہلتے رہے اور چھت پر ان کے غیر مسلح ملازم موجود تھے۔ رینجرز اہلکاروں نے موقع پر پہنچنے والے اخباری فوٹوگرافروں کو محاصرے کی تصاویر لینے سے روک دیا اور ان کے کیمرے چھین لیئے۔

بی این پی کے سربراہ کی غیر اعلانیہ نظر بندی کے اطلاع پر ایم این اے رؤف مینگل، ایم پی اے اختر لانگو اور اختر میگل کے بھتیجے اور بھانجے بھی کوئٹہ سے کراچی پہنچ گئے اور گھر کے باہر موجود رہے۔

سردار اختر مینگل نے بی بی سی سے بات کرتے ہوئے کہا کہ’ تین روز قبل موٹر سائیکل پر سوار سادہ کپڑوں میں ہیلمٹ پہنے دو افراد نے میرے بچوں کا سکول جاتے ہوئے پیچھا کیا، جس پر ڈرائیور ہوشیار ہوگیا۔ وہ لوگ پیچھا کرتے سکول پہنچ گئے جہاں کھڑے ہوکر انہوں نے غور سے بچوں کو دیکھا تو اس واقعہ کی اطلاع ڈرائیور نےگھر پر دی‘۔

اختر مینگل کا کہنا تھا کہ سکول میں رینجرز ہیڈ کوراٹر سے فون کر کے یہ اطلاع دی گئی کہ سردار اختر کے دو بچے اغوا ہوگئے ہیں جس پر سکول کی پرنسپل نےگھر فون کر کے اس اطلاع کے بارے میں بتایا اور مجھے کوئٹہ میں یہ اطلاع دی گئی مگر بچے خیریت سے سکول میں تھے‘۔

سردار اختر نے بتایا کہ وہ کوئٹہ سے کراچی پہنچ گئے اور اس صورتحال کے پیشِ نظر بدھ کو جب وہ خود بچوں کو سکول چھوڑنے کے لیئے نکلے تو دو مشکوک افراد نے موٹر سائیکل پر ان کا پیچھا کیا۔ ان کا کہنا تھا کہ ’میں بچوں کو سکول چھوڑ کر واپس آیا تو وہ دونوں ہمارے گھر کی گلی میں آ کر رک گئے‘۔

اختر مینگل کے مطابق’میں نے جا کر ان سے پوچھا کہ تم کون ہو، تو ایک نے موبائل فون پر بات شروع کردی اور دوسرے نے جیب میں ہاتھ ڈالا۔ جس پر ہمارے لوگ ان کو اپنے ساتھ لےکر آ گئے۔ دونوں مشکوک افراد نے اپنا تعارف ملٹری انٹیلیجنس کے حوالے سے کروایا اور اپنا نام قربان اور فیاض بتایا۔ اس کے تھوڑی دیر بعد پولیس نے ہمارے گھر کو گھیرے میں لے لیا‘۔

بلوچ قوم پرست رہنما نے بتایا کہ ان کی ڈی آئی جی کراچی سے بات ہوئی تھی جن کا کہنا تھا کہ’یہ لوگ ایجنسی کے آدمی ہیں۔ ان کو چھوڑ دیں، پولیس واپس چلی جائےگی۔ ہم نے ان کو چھوڑ دیا مگر پولیس موجود رہی‘۔

سردار اختر کے مطابق کراچی میں روز لوگ مرتے اور اغوا ہوتے ہیں۔ کسی کے چہرے پر تو نہیں لکھا ہوتا کہ وہ ایجنسی کے لوگ ہیں۔