اختر مینگل کی رہائش گاہ کا محاصرہ کر کے ان ملازمین کو حراست میں لیا گیا تھا

کراچی میں بلوچ قوم پرست رہنما اور بی این پی کے سربراہ سردار اختر مینگل سمیت کئی لوگوں کے خلاف خفیہ ادارے کے ارکان کے اغوا اور ان پر تشدد کے الزام میں بدھ کی شب مقدمہ درج کیا گیا تھا اور پولیس نے ان کے تین ملازمین کو گرفتار بھی کرلیا تھا۔

تاہم جمعرات کو گرفتار شدہ افراد کے بارے کچھ بھی نہیں بتایا جارہا تھا نہ ہی ان افراد کو ریمانڈ کے لیے پولیس حکام کی جانب سے کسی بھی عدالت میں پیش کیا گیا۔

مقدمہ قربان حسین نامی ایک فوجی اہلکار کی مدعیت میں درج کیا گیا تھا جس کے مطابق فوج میں حوالدار قربان حسین اپنے نائیک فیاض کے ساتھ بدھ کی صبح کلفٹن پر ڈیوٹی پر مامور تھا کہ صبح سات بج کر پچپن منٹ پر خیابان کمرشل سے ایک کالے رنگ کی ڈبل کیبن وین میں سوار مسلح افراد نے انہیں زدو کوب کیا تھا۔

تاہم سردار اختر مینگل کے مطابق دونوں افراد نے سادے لباس میں ان کا تعاقب کیا تھا۔ تعاقب کرنے والوں کو اختر مینگل کے ملازمین نے روکا اور دونوں افراد نے خود کو ملٹری انٹیلی جنس کے اہلکاروں کے طور پر متعارف کرایا تھا۔

پولیس نے پورے دن سردار اختر مینگل کے ڈیفنس میں واقع گھر کا محاصرہ کر کے اختر مینگل اور ان کے ملازمین کے خلاف مقدمہ درج کرکے تینوں افراد کو گرفتار کر لیا تھا۔

لیکن جمعرات کو بی این پی کے رکن قومی اسمبلی عبدالرؤوف مینگل نے ایک پریس کانفرنس میں بتایا کہ وہ سردار اختر مینگل کے ساتھ صبح جب درخشاں تھانے گرفتار لوگوں کی خیریت دریافت کرنے کے لیئے گئے تو تینوں ملازمین وہاں نہیں تھے۔

عبدالرؤوف مینگل نے تینوں افراد کی سلامتی کے بارے میں شدید خدشات ظاہر کرتے ہوئے کہا کہ گرفتار ہونے والے کو ایجنسیوں نے اپنے قبضے میں لے لیا ہے اور ہوسکتا ہے کہ اب ان کی لاشیں ہی ملیں۔

دوسری جانب درخشاں پولیس اسٹیشن کے عملے کے مطابق گرفتار کیے گئے تینوں لوگوں کو پولیس کی انوسٹی گیشن برانچ کے حوالے کردیا گیا ہے جبکہ انوسٹی گیشن برانچ کے اہلکاروں نے تینوں افراد کے متعلق مکمل لاعلمی ظاہر کی ہے۔

پولیس کے اعلٰی افسران کوشش کے باوجود اس معاملے پر گفتگو کے لیے دستیاب نہیں تھے۔