پولیس نےپتنگ بازوں کے گھروں پر چھاپے مارے

بسنت پر ویڈیو رپورٹ

اطلاعات کے مطابق لاہور میں جمعرات کو حکومتِ پنجاب کی جانب سے ڈور پھرنے سے سات افراد کی ہلاکت کے بعد عائد کی جانے والے پابندی کا اثر مکمل طور پر دیکھنے میں نہیں آیا اور آسمان پر رنگ برنگی پتنگیں اڑتی رہیں تاہم ان کی تعداد معمول سے کم تھی۔

لاہور پولیس نے ہفتے کی رات سے شہر کے مختلف علاقوں میں پتنگ بازوں کے گھروں پر چھاپے مارنے شروع کر دیے تھے اور رات بھر میں ایک سو پچیس افراد کو پتنگیں اڑانے، فروخت کرنے اور ہوائی فائرنگ کے الزام میں گرفتار کیا گیا جبکہ ساڑھے تین سو سے زیادہ افراد کو اتوار کے دن گرفتار کیا گیا۔عینی شاہدین کے مطابق پولیس کے پہنچنے پر بہت سے پتنگ باز ڈور چھوڑ کر اس بات سے ہی منکر ہوگئے کہ وہ پتنگ اڑا رہے تھے۔

	گرفتار شدگان میں ہر عمر کے پتنگ باز شامل ہیں

کیپیٹل پولیس کے سربراہ خواجہ خالد فاروق کا کہنا ہے کہ گرفتار شدہ افراد کو جرمانے اور چھ ماہ قید تک کی سزا دی جا سکتی ہے۔ پولیس ذارئع نے نام ظاہر نہ کرنے کی شرط پر بتایا ہے کہ کچھ پولیس افسران کو اپنے علاقے میں پتنگ بازی پر مکمل قابو نہ پانے کی وجہ سے معطل بھی کیا گیا ہے۔

لاہور میں جشنِ بہاراں میں پتنگ بازی پر پابندی کے باوجود دیگر تقریبات اپنے پروگرام کے مطابق جاری ہیں اور شہر کے مختلف مقامات پر موسیقی کی سرکاری اور نجی محفلوں کا اہتمام بھی کیا گیا ہے۔اسی سلسلے میں پارکس اینڈ ہارٹیکلچر ڈیپارٹمنٹ کے زیرِ اہتمام لاہور کے ریس کورس پارک میں بھی ایک محفلِ موسیقی کا اہتمام کیا گیا جس میں بڑی تعداد میں لوگوں نے شرکت کی۔