ذوالفقار علی بی بی سی ، اردو ڈاٹ کام، مظفرآباد

	ان علاقوں میں لوگوں کو شدید مشکلات کا سامنا ہے

مظفرآباد میں پاکستان کی فوج کے ترجمان میجر فاروق ناصر نے بی بی سی کو بتایا متاثرہ علاقوں میں لوگوں کو امدادی پروازوں کے ذریعے خیموں کو ڈھانپنے کے لیے پلاسٹک شیٹس بھیجی جارہی ہیں۔

انھوں نے کہا اس کے علاوہ متاثرین کے لیے مٹی کے تیل پر چلنے والے چولھے ، کمبل ، ٹین کی چادریں بیجی اور بچوں کے لئے گرم کپڑے روانہ کئے جارہے ہیں۔

فوج کے ترجمان کا کہنا ہے تھا کہ وادی نیلم اور جہلم کو جانے والی سڑکوں کو کھولنے کے لیے فوج کے انجنئیر کام کر رہے ہیں۔

ان کا کہنا تھا کہ وادی جہلم کو جانے والی سڑک کا کچھ حصہ آمدورفت کے لئے کھول دیا گیا اور یہ کہ کل تک یہ سڑک چکوٹھی تک کھول دی جائے گی۔ البتہ وادی نیلم کو جانے والے سڑک بدستور بند ہے۔

میجر فاروق کا کہنا تھا کہ وادی جہلم کو جانے والی سڑک جہاں تک کھول دی گئی وہاں تک گاڑیوں کے ذریعے امدادی سامان پہنچایا جارہا ہے۔ متاثرہ اضلاع میں اندرونی سڑکوں کے بند ہونے کے باعث اسوقت سینکڑوں دیہاتوں کا پاکستان سے زمینی رابطہ منقطع ہے۔

حالیہ بارشوں اور برف باری کے باعث سردی کی شدت میں اضافے کے باعث متاثرین کی مشکالات میں اضافہ ہوا ہے۔

پہاڑی علاقوں میں اب بھی ایسے بہت سارے لوگ ہیں جن کو عارضی رہائش کے لئے ٹین کی چادریں نہیں ملی ہیں۔

اقوام متحدہ کے اداروں کا کہنا ہے کہ اس وقت سب سے بڑا چلینج متاثرہ علاقوں میں سولہ لاکھ بچوں کو سردی سے بچانا ہے۔

	لوگ سخت موسم کا سامنا کر رہے ہیں

مظفرآباد میں صحت کے حکام کا کہنا ہے کہ حالیہ بارشوں اور برف باری کے باعث سردی کی امراض کی شرح میں دس سے پندرہ فیصد اضافہ ہوا ہے۔

ان کا کہنا تھا کہ بچے اور بڑی عمر کے لوگ سب سے زیادہ متاثرہ ہورہے ہیں ۔ تاہم ان کا کہنا تھا کہ صورت حال قابو میں ہے۔

انہوں نے سردی کے امراض کی شرح میں اضافے کی سب سے بڑی وجہ یہ بتائی کہ متاثریں کے پاس نہ ہی مناسب رہائش ہے اور نہ ہی اپنے آپ کو گرم رکھنے کے لئے کوئی معقول انتظام ہے۔

اقوام متحدہ کے بچوں کے عالمی تنظیم یونیسیف کا کہنا ہے کہ اب بھی بہت سارے ایسے بچے ہیں جن کے پاس نہ تو گرم کپڑے ہیں اور نہ ہی ان کے پاس جوتے ہیں۔