اعجاز مہر
بی بی سی اردو ڈاٹ کام، کوئٹہ |  |
| | | مختلف مقامات پر راکٹ فائر کیے جانے کی اطلاعات ملی ہیں |
بلوچستان سے ملنے والی اطلاعات کے مطابق کوہلو ضلع میں مری قبائل اور سکیورٹی فورسز میں مسلح جھڑپیں جاری ہیں جبکہ ضلع ڈیرہ بگٹی میں بارودی سرنگ پھٹنے سے فرنٹیئر کور کا ایک اہلکار ہلاک اور دو زخمی ہوگئے ہیں۔ فرنٹیئر کور یعنی ’ایف سی‘ کے مطابق ڈیرہ بگٹی میں پتھر نالہ کے قریب منگل اور بدھ کی درمیانی شب بارودی سرنگ پھٹنے سے ایف سی کا ایک اہلکار مظہر علی ہلاک اور دو زخمی ہوگئے ہیں۔ جبکہ جمہوری وطن پارٹی کے سیکریٹری جنرل آغا شاہد بگٹی کا دعویٰ ہے کہ ایف سی کے سات اہلکار زخمی ہوگئے ہیں۔ گزشتہ شب صدر جنرل پرویز مشرف کے قوم سے خطاب کے دوران بلوچستان میں ’شرپسندوں‘ کے خلاف کارروائی جاری رکھنے کے اعلان کے بعد کوہلو ضلع کے مختلف مقامات پر راکٹ فائر کیے جانے کی اطلاعات ملی ہیں اور یہ سلسلہ بدھ سے جاری ہے۔ اطلاعات کے مطابق کوہلو ضلع کے شہر کاہان میں واقع ایف سی کے قلعہ پر تاحال نو راکٹ فائر کیے گئے جبکہ نال اور جندران کے علاقوں میں بھی راکٹ فائر کیے گئے ہیں۔ بدھ کی دوپہر تک ملنے والی اطلاعات کے مطابق ایف سی اور مری قبائل میں فائرنگ کا تبادلہ جاری تھا لیکن جانی یا مالی نقصان کے بارے میں ابھی تک کوئی اطلاع نہیں ملی۔ واضح رہے کہ منگل کے روز کوہلو میں ایک بارودی سرنگ پھٹنے سے ایف سی کا ایک اہلکار ہلاک ہوگیا تھا۔ | 
’ کوہلوفوجی آپریشن میں 50 ہلاک‘
