ندیم سعید بی بی سی اردو ڈاٹ کام، ملتان

	دو دن قبل بھی ڈیرہ غازی خان میں ہی ریلوے لائن کو بم سے اڑا دیا گیا تھا

پولیس حکام کے مطابق ریلوے لائن کو جمعے کی شب کوئٹہ روڈ پر تھانہ صدر کی حدود میں گدائی کے قریب تخریبی کارروائی کا نشانہ بنایا گیا ہے۔ تھانہ صدر کے انچارج چودھری علی محمد نے جائے حادثہ سے بات کرتے ہوئے بی بی سی کو بتایا کہ بم دھماکے سے پٹڑی کا اڑھائی فٹ کے قریب ٹکڑا متاثر ہوا ہے۔

ان کا کہنا تھا کہ ایکسپلوسوز (دھماکہ خیز مواد) کے ماہرین کی رائے میں بم دیسی ساخت کا تھا جس میں دو کلو کے قریب بارود استعمال کیا گیا۔انہوں نے بتایا کہ اس واقعہ کے حوالے سے نامعلوم افراد کے خلاف انسداد دہشت گردی ایکٹ کے تحت مقدمہ درج کیا جا رہا ہے۔ دھماکے کے بعد چلتن ایکپسریس کو جائے حادثہ سے پینتیس کلومیٹر دور جامپور ریلوے سٹیشن پر روک لیا گیا۔

بم دھماکے کی جگہ ڈیرہ غازی خان میں قائم پاکستان اٹامک انرجی کمیشن کے دفاتر اور پلانٹ سے چند سو گز کے فاصلے پر بتائی جارہی ہے۔ دو روز قبل ڈیرہ کے علاقے کوٹ مبارک کی بستی حیات کے قریب بھی ریلوے لائن کو اس وقت بارود سے اڑایا گیا تھا جب چلتن ایکسپریس کی آمد متوقع تھی۔

بلوچستان سے ملحقہ پنجاب کے اس ضلع میں حالیہ کچھ مہینوں میں ریلوے لائنز، گیس پائپ لائنز اور بجلی کے کھمبوں سمیت دوسری سرکاری تنصیبات کو بارود سے اڑانے کے کئی واقعات ہوچکے ہیں۔ تاہم ان واقعات میں اب تک کوئی جانی نقصان نہیں ہوا۔ جبکہ پولیس ان وارداتوں میں ملوث افراد یا گروہ کا سراغ لگانے میں مکمل طور پر ناکام رہی ہے۔