ندیم سعید
بی بی سی اردو ڈاٹ کام، ملتان |  |
پنجاب کے شہر صادق آباد میں ریلوے لائن سنیچر کو اس وقت بارود کے ذریعے اڑا دی گئی جب تھوڑی دیر بعد شاہ رکن عالم ایکسپریس گزرنے والی تھی۔ ریلوے حکام کے مطابق صادق آباد ریلوے سٹیشن سے دو کلومیٹر کے فاصلے پر نامعلوم شرپسندوں نے پٹڑی کو بم سے اڑا دیا جس کے نتیجے میں ریلوے لائن کا پانچ فٹ کے قریب ٹکڑا متاثر ہوا۔ دھماکے سے قبل روہڑی پسنجر ٹرین وہاں سے گزری تھی۔ واقعہ کی اطلاع سب سے پہلےپٹڑی کی دیکھ بھال کرنے والی ریلوے کی ایک جماعت کے رکن گینگ مین ولی محمد نے دی۔ اطلاع پاتے ہی شاہ رکن عالم ایکسپریس کو خانپور ریلوے سٹیشن پر روک لیا گیا۔ ریلوے سکھر ڈویژن کے سپرنٹنڈنٹ نذیر چوہدری کے مطابق پٹڑی کے متاثرہ حصے کی مرمت کر لی گئی ہے اور چند گھنٹوں کے تعطل کے بعد ریل گاڑیوں کی آمدورفت اب بحال ہو چکی ہے۔ بم ڈسپوزل سکواڈ کے ماہرین کے مطابق دھماکے میں استعمال کیا جانے والا مواد ایک کلو گرام کا دیسی ساخت کا بم تھا۔ اس سال فروری کے مہینے میں بلوچستان سے ملحقہ پنجاب کے ضلع ڈیرہ غازی خان میں بھی ریلوے لائن کو متعدد بار تخریبی کاروائیوں کا نشانہ بنایا گیا تھا۔ اخباری اطلاعات کے مطابق علیحدگی پسند زیر زمین کام کرنے والی بلوچ لبریشن آرمی نامی تنظیم نے ڈیرہ میں ریلوے لائن اور گیس اور تیل کی پائپ لائنوں پر حملے کی ذمہ داری قبول کی تھی۔ | 
یہ صفحہ دوست کو ای میل کیجیئے
پرِنٹ کریں
