عزیز اللہ خان بی بی سی اردو ڈاٹ کام،کوئٹہ

	راکٹ فائر کرنے والے شرپسندوں کے خلاف کارروائی ہورہی ہے

سبی ریلوے کے سٹیشن ماسٹر ریاض نے بتایا ہے کہ دھماکہ سبی ہرنائی سیکشن کے پل نمبر ستائیس پر تندوری کے مقام پر ہوا ہے۔

انھوں نے کہا ہے کہ دھماکے سے پل کا ڈیڑھ سو فٹ سے زیادہ حصہ تباہ ہو گیا ہے جس کی مرمت میں تین سے چار دن لگ سکتے ہیں۔ اس دھماکے سے سبی اور ہرنائی کے درمیان چلنے والی پسنجر ٹرین معطل ہو گئی ہے۔

ادھر ڈیرہ بگٹی سے حالات کشیدہ بتائے گئے ہیں جہاں فرنٹیئر کور کے اہلکار اور بگٹی قبائل کے لوگ آمنے سامنے مورچہ بند ہیں۔

ڈیرہ بگٹی کے ضلعی رابطہ افسر عبدالصمد لاسی نے کہا ہے کہ قبائل کے لوگوں نے سرکاری عمارتوں پر مورچے قائم کر رکھے ہیں جنہیں خالی کرانا ضروری ہے۔ علاقے سے مقامی لوگ شہر چھوڑ کر باہر جا رہے ہیں۔ بازار اور دکانیں بند ہیں۔