عزیزاللہ خان بی بی سی اردو ڈاٹ کام، کوئٹہ

	کوہلو میں چھٹے روز بھی حملوں کی اطلاعات ملی ہیں (فائل فوٹو)

کوہلو سے ملنے والی اطلاعات کے مطابق بھمبھر اور جندران کے علاقوں میں سکیورٹی فورسز اور مشتبہ افراد کے درمیان مبینہ جھڑپیں ہوئی ہیں جبکہ کوہلو کے دیگر مقامات پر سکیورٹی فورسز نے حملے کیے ہیں۔

ادھر بارکھان میں جمعرات کی صبح نا معلوم افراد نے کوہلو بارکھان فیڈر کے بجلی کے دو کھمبے دھماکے سے اڑا دیے ہیں جس سے کوہلو کو بجلی کی ترسیل منقطع ہو گئی ہے۔

بجلی کے محکمہ کے اہلکار نے بتایا کہ سکیورٹی فورسز کی اجازت کے بعد متعلقہ علاقے میں ٹیم مرمت کے لیے روانہ کر دی جائے گی۔

بدھ کی رات کوئٹہ اور ہرنائی میں چار راکٹ داغے گئے۔ ہرنائی میں ایک راکٹ ریلوے کے ایک کوارٹر میں گرا جس سے دو افراد زخمی ہوئے ہیں۔

پولیس حکام نے بتایا ہے کہ یہ راکٹ شہر کے جنوب میں واقع پہاڑوں سے داغے گئے ہیں۔

میرک بلوچ نا می شخص نے ٹیلیفون پر کہا کہ کوئٹہ میں بلوچ لبریشن آرمی کی جانب سے راکٹ داغے گئے۔

میرک بلوچ نے کہا کہ شیخ محمود کے علاقے میں ان کے ساتھیوں نے دو ہیلی کاپٹروں پر حملے بھی کیے ہیں جس میں ایک کو نقصان پہنچا ہے لیکن فرنٹئیر کور کے ترجمان نے اس کی تردید کی ہے اور کہا ہے کہ ایسا کوئی واقعہ پیش نہیں آیا۔

ترجمان نے کوہلو میں جاری کارروائی میں جانی نقصان کے بارے میں لاعلمی کا اظہار کیا ہے۔