اعجاز مہر بی بی سی اردو ڈاٹ کام، اسلام آْباد

	مظاہرین کا کہنا تھا کہ قبائلی علاقوں میں صحافت مفلوج ہوچکی ہے

جلوس اور مظاہرے میں قبائلی علاقہ جات کےصحافیوں کے علاوہ مقامی صحافی بھی شریک تھے۔

قبائلی علاقہ جات کے صحافیوں کی تنظیم کے سربراہ سیلاب خان محسود نے اس موقع پر خطاب کرتے ہوئے کہا کہ حکومت، قبائلی سردار اور مولویوں نے صحافت کو قید کردیا ہے اور قبائلی علاقوں میں صحافت مفلوج ہوچکی ہے۔

انہوں نے کہا کہ حکومت کا دعویٰ ہے کہ حیات اللہ کو کسی حکومتی ادارے نے اغواء نہیں کیا لیکن انہوں نے دعویٰ کیا کہ حیات اللہ ’سرکاری مہمان‘ ہے۔

اس موقع پر فوزیہ شاہد، کمال اظفر اور دیگر نے بھی خطاب کیا اور بتایا کہ گزشتہ ایک برس کے اندر قبائلی علاقہ جات میں تین صحافیوں اللہ نور، میر نواب اور نصیر احمد آفریدی کو قتل کیا گیا ہے جبکہ ان کے مطابق مختلف مواقع پر ہونے والے حملوں میں مجیب الرحمان اور محمد انور شاکر زخمی ہوئے اور دلاور خان وزیر بم دھماکے میں بال بال بچ گئے۔

سیلاب خان اور دیگر مقررین نے کہا کہ حکومتی ادارے، قبائلی سردار اور طالبان کے حامی مسلسل صحافیوں کو جان سے مارنے کی دھمکیاں دے رہے ہیں۔ ان کے مطابق دھمکیوں کے باعث چار صحافی وزیرستان سے نقل مکانی کرگئے ہیں۔

صحافیوں کے آٹھ رکنی وفد نے بعد میں اقوام متحدہ کے دفتر میں ایک یادداشت نامہ بھی پیش کیا جس میں قبائلی علاقوں میں صحافیوں کے ساتھ ہونے والی
ناانصافیوں اور پیش آنے والی رکاوٹوں کے بارے میں تفصیل لکھی ہے۔