ریاض سہیل بی بی سی اردوڈاٹ کام کراچی

	زلزلے سے متاثرہ ان ماؤں اور بچوں کا کیا ہو گا جن کا کوئی نہیں بچا

ناظم آباد پولیس کا کہنا ہے کہ جمعہ کی شب تراویح کے وقت انہیں مخبر نے اطلاع دی کہ الرحمت ٹرسٹ کے نام سے کچھ لوگ زلزلے زدگان کی لیے چندہ جمع کر رہے ہیں۔ ان لوگوں کا تعلق کالعدم تنظیم سے ہے۔

اے ایس آئی ندیم کے مطابق پولیس نے پانچ افراد کو گرفتار کرلیا جن کی شناخت خرم، اسلم پرویز، اعظم، اسماعیل اور عارف کے طور پر ہوئی۔ ان کی عمریں اکیس سے پچاس برس کے درمیان بیان کی گئی ہیں۔

پولیس کا کہنا ہے کہ ملزمان زلزلہ زدگان کی آڑ میں کالعدم تنظیم جیش محمد کے لیے چندہ جمع کر رہے تھے۔ان سے چندے کی کتابیں اور ساڑہ چارسو روپے بھی برآمد ہوئے ہیں۔

پولیس نے بتایا ہے کہ کسی نے ان کی شکایت نہیں کی پولیس نے کارروائی اپنے طور کی ہے اور گرفتار شدگان پر اس سے قبل کوئی مقدمہ درج نہیں ہے۔

کراچی کے گلبہار کے علاقے کے رہائشی ان افراد پر پولیس نے انسداد دہشت گردی کے ایکٹ تحت مقدمہ درج کرلیا ہے۔

واضح رہے کہ کشمیر میں کچھ کالعدم تنظیموں میں متاثرین کی مدد کے لیے کیمپ قائم کیے ہیں اور صدر پرویز مشرف نے گزشتہ ہفتے ایک انٹرویو میں کہا تھا کہ جہادی تنظیموں کو امدادی سرگرمیوں سے روکا نہیں جاسکتا مگر انہیں پھر متحرک ہونے نہیں دیا جائیگا۔

یاد رہے کہ کچھ تجزیہ نگاروں کا کہنا ہے کہ جہادی تنظیمیں زلزلے کی صورتحال میں امدادی کام کے ذریعے لوگوں کی ہمدردی حاصل کرنا چاہتی ہیں۔