ریاض سہیل بی بی سی اردو ڈاٹ کام ، کراچی

	بھارتی وزیر خارجہ نے وزیر اعلیٰ سندھ کو بھارت آنے کی دعوت دی۔

بھارتی وزیر خارجہ نٹور سنگھ منگل کے روز کراچی پہنچے۔انہوں نے یہاں گورنر سندھ عشرت العباد اور اور وزیر اعلیٰ سندھ ارباب غلام رحیم سے ملاقات کی۔

صحافیوں سے بات چیت کرتے ہوئے بھارتی وزیر خارجہ نے کہا کہ دسمبر یا جنوری تک کراچی میں بھارتی قونصل خانہ کام شروع کردے گا جہاں سے ویزے بھی جاری کئے جائیں گے۔انہوں نے کہا کہ وہ قونصل خانہ کھولنے کا جائزہ لینے کے لئے کراچی آئے ہیں۔

نٹور سنگھ نے کہا کہ جلد ہی کراچی اور ممبئی میں دونوں ممالک کے قونصل خانے کام شروع کردیں گے۔انہوں نے بتایا کہ کھوکھراپار موناباؤ سرحد بھی دسمبر جنوری تک کھل جائے گی۔ اسی کے ساتھ ممبئی اور کراچی کے درمیان فیری سروس شروع کردی جائے گی۔

انہوں نے کہا کہ عوام کے اعتماد کے ساتھ ہونی والی بات چیت فائدے مند ہوتی ہے اور حالیہ مذاکرات میں عوام کی حمایت حاصل ہے۔

بھارتی وزیر خارجہ نے اس موقعہ پر وزیر اعلیٰ سندھ کو بھارت آنے کی دعوت دی۔

وزیراعلیٰ سندھ نے کہا کہ تھر اور راجستھان کا کلچر ایک جیسا ہے۔ جس طرح سے بھارت اور پاکستان کے دونوں پنجاب کے لوگ ایک دوسرے کے پاس آسکتے ہیں اسی طرح سے تھر اور راجستھان کے لوگوں کو بھی ایک دوسرے کے پاس آنے جانے کی سہولت ہونی چاہیے۔