عدنان عادل بی بی سی اردو ڈاٹ کام، لاہور

چودھری شجاعت حسین گروپ کے بارہ ناظم اور نائب ناظم بلا مقابلہ منتخب ہوچکے ہیں

حزب اختلاف کے عوام دوست گروپ کا کہنا ہے کہ ان کے امیدواروں کو ڈرا دھمکا کر دستبردار کرایا جارہا ہے جبکہ چودھری شجاعت گروپ کا کہنا ہے کہ مخالف پارٹی کے پاس ان کے مقابلہ کے لیے امیدوار ہی نہیں۔

یونین کونسلوں کے ناظم ضلع کونسل کے ناظم اور یونین کونسلوں کے نائب ناظم تحصیل کونسل کے ناظموں کا انتخاب کریں گے جو انتیس ستمبر کو ہوں گے۔ گجرات کی تین تحصیلوں۔ گجرات، کھاریاں اور سرائے عالمگیر۔ میں ایک سو سترہ یونین کونسلیں ہیں جہاں پچیس اگست کو دوسرے مرحلے میں ووٹنگ ہوگی۔

جی ٹی روڈ پر واقع گجرات شہر میں داخل ہوتے ہی جگہ جگہ بڑے بڑے بورڈز لگے نظر آتے ہیں جن پر چودھری شجاعت حسین اور ان کے بھائی اور رکن قومی اسمبلی چودھری وجاہت حسین کی بڑی بڑی تصویریں مقامی انتخابات کے امیدواروں کے ساتھ بنی ہیں۔ انتخابی اشتہار کے ان بورڈز پر شجاعت گروپ لکھا ہے۔ گجرات کے تقریبا ایک درجن کے قریب مقامی اخباروں کے صفحے

الیکشن کے موقع پر محکمہ ہائی کی جانب سے شائع کیا جانے والا ایک پوسٹر

گو کہ الیکشن کمیشن کے قواعد کی رُو سے بل بورڈز لگانا یا مبینہ طور پر غیر جماعتی طور پر کرائے جانے والے مقامی انتخابات میں سیاسی شخصیتوں یا نشانات کا استعمال ممنوع قرار دیا گیا ہے لیکن مسلم لیگ گجرات کے ضلعی صدر چودھری طفیل کہتے ہیں کہ یہ بورڈز اس بات کا اظہار ہیں کہ چودھری شجاعت گروپ کے امیدوار صرف الیکشن لڑ ہی نہیں رہے بلکہ انہیں جیتنا بھی چاہتے ہیں۔ ان کا کہنا ہے کہ مخالف گروپ کے بورڈز اس لیے موجود نہیں کہ ان کے امیدواروں کو اپنی شکست کا علم ہے اور وہ پیسہ خرچ نہیں کرنا چاہتے۔

گجرات بظاہر کشادہ اور صاف ستھری سڑکوں کا شہر دکھائی دیتا ہے اور پنجاب کا واحد ضلعی مقام ہے جہاں ایک یونیورسٹی بھی کھولی گئی ہے۔ جی ٹی روڈ سے شہر میں داخل ہونے والی رابطہ سڑک کھدی ہوئی ہے جسے مزید چوڑا کرنے کے لیے کام جاری ہے اور وہاں پر ایک بورڈ پر لکھا ہے کہ یہ سڑک پاکستان مسلم لیگ کے صدر چودھری شجاعت حسین تعمیر کروارہے ہیں۔

دراصل شجاعت گروپ ضلع میں گزشتہ چار سال میں کرائے جانے والے ترقیاتی کاموں کو ہی اپنے الیکشن کا بڑا نعرہ بنائے ہوئے ہے۔ مسلم لیگ کے چودھری طفیل کہتے ہیں کہ ان چار برسوں میں ضلع کے ناظم اور چودھری شجاعت کے بھائی چودھری شفاعت نے ہر شعبہ میں اتنے کام کرائے ہیں کہ یہ ضلع کی تاریخ کا بہترین دور ہے۔ گجرات شہر تک سوئی گیس کی بڑی پائپ لائن بھی بچھ گئی ہے اور ایک سال تک یہاں گھروں میں گیس مہیا کردی جائے گی۔ چھوٹے چھوٹے گاؤں اور اضافی بستیوں تک بجلی پہنچادی گئی ہے۔

پوسٹروں کی آرائش کی اپنی ایک حیثیت ہے

اسی گروپ کے گجرات شہر میں انتخابی مہم کے نگراں فخر پگانوالہ کہتے ہیں کہ گجرات میں اندھیر نگری ہے۔ وہ الزام لگاتے ہیں کہ اس کی سرپرستی چودھری شجاعت حسین کے بھائی چودھری وجاہت حسین کرتے ہیں جن کے پاس اس علاقہ کا اصل اختیار اور اقتدار ہے اور ان کا مرکز نواحی گاؤں میں اپنے گھر اور ڈیرہ ہے۔

انتخابات میں سیاسی جماعتوں کی شرکت اور سیاسی شناخت پر پانبدی ہے

شجاعت گروپ کے رہنماء کا کہنا ہے کہ گجرات کی ایک سو سترہ میں سے بارہ یونین کونسلوں میں ان کے گروپ کے ناظم اور نائب ناظم کے امیدوار بلا مقابلہ کامیاب ہوئے ہیں اور ان میں صرف ایک جگہ مدینہ سعیداں میں عوام دوست گروپ کا امیدوار تھا جو جعلی سند کی وجہ سے ناہل قرار دے دیا گیا۔ ان کے مطابق باقی سب جگہوں پر عوام دوست گروپ کا کوئی امیدوار ہی نہیں تھا۔

جن یونین کونسلوں میں شجاعت گروپ کے بلامقابلہ ناظم منتخب ہوئے ہیں ان میں ٹھل بکول، بھاگڑیاں والا، یو سی تینتالیس، جھیراں والی، بولے کی، ناگریاں والا، منگو والا، ٹھٹھہ موسی، حاجی والا، پیر شاہ، یو سی باسٹھ اورمدینہ سعیداں شامل ہیں۔

تاہم عوام دوست گروپ کا کہنا ہے کہ اس کے امیدواروں کو ڈرا دھمکا کر اور انہیں اغوا کرکے انہیں دستبردار ہونے پر مجبور کیا جارہا ہے تاکہ سرکاری گروپ کے زیادہ سے زیادہ ناظموں کو بلا مقابلہ منتخب کرایا جائے۔ فخر پگانوالہ کا کہنا ہے کہ ان کے ایک امیدوار ارشد محمود بھٹی کو اغواکیا گیا۔ تین روز بعد اس نے ظہور پیلس میں جاکر چودھری وجاہت کی موجودگی میں مسلم لیگ میں شامل ہونے کا اعلان کردیا اور اسٹامپ پیپر پر اپنی دستبرداری کا اعلان کردیا۔ یوں شجاعت گروپ کا امیدوار بلا مقابلہ منتخب ہوگیا۔

اسی طرح تیرہ اگست کو گجرات میں پیپلز پارٹی یوتھ کے ضلعی صدر اور نائب ناظم کے ایک امیدوار میر انجم گھر سے غائب ہوگئے۔ ان پر پولیس نے شجاعت گروپ کے امیدوار کے باڈی گارڈز کو اغوا کرنے کا مقدمہ درج کیا۔ پیپلز پارٹی کے رہنما الزام لگاتے ہیں کہ میر انجم کو دراصل دستبردار کرانے کے لیے اغوا کیا گیا ہے تاکہ بیلجئم سے گجرات آکر ناظم کا الیکشن لڑنے والے مہر افضل کو بلا مقابلہ منتخب کرایاجاسکے۔

کچھ لوگوں کا کہنا ہے کہ پوسٹر پر چوہدری شجاعت کا نام لکھنا کامیابی کی ضمانت ہے

گجرات کے دیہی علاقوں میں عوام دوست گروپ کی مہم کے نگراں نوابزادہ غضنفر گل کہتے ہیں کہ ان کے گروپ کے امیدواروں کو پولس کی حراست میں رکھ کر دستبردار کرایا جارہا ہے۔ وہ تھانہ جلال پور جٹاں اور تھانہ کنجاہ سے اس کی متعدد مثالیں دیتے ہیں۔ ان کا یہ بھی کہنا ہے کہ حزب مخالف کے ووٹ خراب کرنے کے لیے پولنگ اسٹیشنوں کی اسکیم تبدیل کی گئی ہے اور تیس تیس سال سے بنے والے پولنگ اسٹیشن تبدیل کردیے گئے ہیں۔

عوام دوست گروپ کے رہنماؤں کا کہنا ہے کہ ضلع میں ناظم کے پندرہ ناظم الیکشن کمیشن کو درخواست کرچکے ہیں کہ وہ اس ضلع کو حساس قرار دے اور پولنگ کے روز یہاں فوج تعینات کرے لیکن ایسا نہیں کیا گیا۔ غضنفر گل کا کہنا ہے کہ پولنگ کے روز گجرات میں خون خرابہ ہونے جارہا ہے۔ فخر پگانوالہ کا کہنا ہے کہ شجاعت گروپ ہمیں بھی بندوق اٹھانے پر مجبور کررہا ہے۔

دونوں گروپوں کے الزامات اور دعووں کا سچ جھوٹ کا فیصلہ تو شائد عدالتیں ہی کرسکتی ہیں لیکن ایک بات واضح نظر آتی ہے کہ گجرات میں الیکشن کمیشن کے بعض قواعد پر عمل نہیں ہورہا اور فضا میں تناؤ اور کشیدگی ہے۔