مبشر زیدی بی بی سی اردو ڈاٹ کام، اسلام آباد

کل جماعتی اعلامیہ میں کہا گیا ہے کہ حزب اختلاف کی جماعتیں اسمبلیوں سے مستعفی ہونے پر بھی غور کر سکتی ہیں

اسلام آباد میں اتحاد برائے بحالی جمہوریت اور متحدہ مجلس عمل سمیت تیس سے زائد سیاسی و دینی جماعتوں نے جمعرات کو آل پارٹیز کانفرنس میں کہا کہ بلدیاتی انتخابات کو شفاف اور غیر جانبدار بنانے کے لئے مستقل چیف الیکشن کمشنر کا تقرر کیا جائے اور الیکشن کمیشن کے ضابطہ اخلاق کی مبینہ خلاف ورزی پر صدر جنرل پرویز مشرف، وزیر اعظم شوکت عزیز، سندھ اور پنجاب کے وزرا اعلی اور وفاقی وصوبائی وزراکے خلاف بلدیاتی انتخابات میں دھاندلی کرنے کے الزام میں مقدمے چلائے جائیں۔

ان جماعتوں کا کہنا تھا کہ صدر جنرل پرویز مشرف کی قیادت میں موجودہ حکومت نے بلدیاتی انتخابات میں رائے دہندگان کو آزادی سے اپنی پسند کے امیدوار منتخب کرنے اور ان کے حق میں مہم چلانے کے بنیادی آئینی حق سے عملاً محروم کر دیا ہے۔

اعلامیے میں کہا گیا ہے کہ صدر جنرل پرویز مشرف نے خاص ذہن کے تحت مستقل الیکشن کمشنر کا تقرر نہیں کیا۔ جماعتوں کے مطابق قائم مقام الیکشن کمشنر کے پاس احکامات پر عمل کروانے کے لئے طاقتور سرکاری مشینری نہیں ہے اور وہ اس بارے میں صوبائی انتظامیہ پر انحصار کرنے پر مجبور ہیں جو انتخابات میں دھاندلی کی ذمہ دار ہے۔

جماعتوں کا یہ بھی دعوی ہے کہ صدر، وزیراعظم اور پنجاب اور سندھ کے وزراء اعلی عام جلسوں میں خطاب کر کے کھلم کھلا حکومت کے حمیت یافتہ امیدواروں کی انتخابی مہم چلا رہے ہیں۔ جماعتوں نے کہا کہ اس سے افواج کا ادارہ بھی بدنام ہو رہا ہے۔

اس اعلامیے کے مطابق پولیس ،انتظامیہ اور ایجنسیاں حکومت مخالف امیدواروں کو اغوا یا گرفتار کر رہی ہیں اور انہیں ڈرا دھمکا کر انتخابات سے دستبردار کروا رہی ہیں۔

اس اعلامیے سے قبل حزب اختلاف کی سیاسی اور دینی جماعتوں کے رہنماؤں نے تقاریر کیں جس میں اس ماہ ہونے والے بلدیاتی انتخابات میں حکومتی جماعتوں کے امیدواروں کے لیے حکومتی مشینری کے استعمال اور حکومت کی زیر نگرانی مبینہ دھاندلی کا الزام عائد کیا ہے۔