اعجاز مہر
بی بی سی اردو ڈاٹ کام، اسلام آباد |  |
|  منور سہروردی کے قتل کے خلاف مظاہرے میں خواتین نے بھی حصہ لیا |
پاکستان پیپلز پارٹی کے رہنما منور سہروردی کے قتل کے خلاف سنیچر کے روز متحدہ حزب اختلاف کی جانب سے پارلیمینٹ لاجز سے پارلیمینٹ ہاؤس تک احتجاجی جلوس نکالا گیا۔ جلوس میں پارلیمینٹ کے دونوں ایوانوں سینیٹ اور قومی اسمبلی میں حزب اختلاف کی تمام جماعتوں کے نمائندوں نے شرکت کی۔ منور سہروردی کے قتل کے خلاف پیپلز پارٹی کی جانب سے تین روز تک سوگ کے سلسلے میں نکالے گئے جلوس کی قیادت اتحاد برائے بحالی جمہوریت کے چیئرمین مخدوم امین فہیم نے کی۔ جلوس میں شامل مرد اور خواتین اراکین پارلیمینٹ منور سہروردی کے قتل کے خلاف سخت نعرہ بازی کر رہے تھے جس میں ’لاٹھی گولی کی سرکار نہیں چلے گی‘ اور ’ کرنل جنرل کی سرکار نہیں چلے گی‘ جیسے نعرے شامل تھے۔ اس موقعہ پر مخدوم امین فہیم کا اخبار نویسوں سے بات چیت کرتے ہوئے کہنا تھا کہ حکومت امن و امان قائم کرنے میں ناکام ہو گئی ہے۔ وہ کہہ رہے تھے کہ بے گناہ لوگ مارے جا رہے ہیں اور کسی کو انصاف بھی نہیں مل رہا۔ ان کا مطالبہ تھا کہ حکومت فوری طور پر حالات ٹھیک کرے یا اقتدار چھوڑ دے۔ متحدہ مجلس عمل کے رہنما حافظ حسین احمد کا کہنا تھا کہ انہوں نے پارلیمینٹ کے اندر احتجاج کیا لیکن حکومت نے کوئی نوٹس نہیں لیا اور وہ مجبور ہو کر سڑکوں پر آئے ہیں۔ انہوں نے خبردار کیا کہ اگر حکومت نے سہروردی کے قاتلوں کو گرفتار نہیں کیا تو متحدہ حزب اختلاف تحریک چلائے گی۔ احتجاجی جلوس کے دوران مجلس عمل کے اراکین نے قبائلی علاقوں میں پاکستان کی سکیورٹی ایجنسیوں کے ہاتھوں ہونے والی ہلاکتوں کی مذمت کرتے ہوئے بھی نعرے بلند کیے۔ جلوس کے شرکاء پارلیمینٹ ہاؤس کے سامنے بھی نعرے لگاتے رہے جس کے بعد وہ اجلاس میں شرکت کے لیے چلے گئے۔ اس موقع پر پولیس کی بھاری نفری تعینات تھی تاہم کوئی ناخوشگوار واقعہ پیش نہیں آیا۔ واضع رہے کہ پارلیمینٹ ہاؤس کے ارد گرد دفعہ 144 نافذ ہے جس کے مطابق جلوس جلسہ کرنے پر پابندی ہے لیکن متعلقہ تھانہ سیکریٹریٹ کے محرر کے مطابق تاحال دو روز سے جلوس نکالنے اور مظاہرہ کرنے پر پیپلز پارٹی کے اراکین کے خلاف پرچہ درج نہیں کیا گیا ہے۔ | 
یہ صفحہ دوست کو ای میل کیجیئے
پرِنٹ کریں
