اعجاز مہر بی بی سی اردو ڈاٹ کام، اسلام آباد

حزب اختلاف کے تمام ارکین نے مشترکہ طور پر احتجاج کیا ہے۔

حزب اختلاف کے اراکین دونوں ایوانوں سے واک آؤٹ کر کے پارلیمینٹ کی عمارت کے باہر سڑک پر جمع ہوئے، جہاں انہوں نے صدر جنرل پرویز مشرف ، مرکزی اور سندھ کی صوبائی حکومت کے خلاف نعرہ بازی بھی کی۔

اتحاد برائے بحالی جمہوریت یعنی ’ اے آر ڈی ، کے اراکین بازوں پر سیاہ پٹیاں باندھ کر اجلاس میں شریک ہوئے۔

قومی اسمبلی میں اے آر ڈی کے پارلیمانی لیڈر مخدوم امین فہیم کا نکتہ اعتراض پر کہنا تھا کہ انہوں نے تین دن تک سہروردی کے قتل کے خلاف ملک بھر میں سوگ اور پرامن احتجاج کرنے کا جو فیصلہ کیا ہے اس ضمن میں وہ ایوان سے واک آؤٹ کرتے ہیں۔ اس طرح ایوان بالا سینیٹ سے بھی تمام حزب اختلاف کے اراکین واک آؤٹ کر گئے۔

احتجاج کرنے والے ارکین اسمبلی اور سینٹ میں مخدوم امین فہیم ، محمود خان اچکزئی، اسفند یار ولی ، عمران خان ، تہمینہ دولتانہ، عبدالرؤف مینگل، لیاقت بلوچ اور حافظ حسین احمد شامل تھے۔ ان کے علاوہ دونوں ایوانوں میں حزب اختلاف کی نشستوں پر بیٹھنے والی تمام جماعتوں کے نمائندے پارلیمان کے سامنے مظاہرے میں شریک ہوئے۔

کچھ دیر مظاہرہ کرنے کے بعد یہ ارکان ’ لاٹھی گولی کی سرکار نہیں چلے گی نہیں چلے گی، کرنل جنرل کی سرکار نہیں چلے گی اور ظالمو خون کا حساب دو کے نعرے لگاتے ہوئے واپس چلے گئے۔

اس موقعہ پر مقررین نے اعلان کیا کہ وہ سنیچر کی صبح ساڑھے آٹھ بجے پارلیمینٹ لاجز میں جمع ہوں گے اور پیدل احتجاجی مارچ کرتے ہوئے پارلیمینٹ ہاؤس تک آئیں گے۔