مبشر زیدی بی بی سی اردو ڈاٹ کام، اسلام آباد

صدر مشرف کے بارے میں کہا جاتا ہے کہ وہ حکمراں جماعت کے امیدواروں کے حق میں بیانات دیتے ہیں

اسلام آباد میں بین الاقوامی ذرائع ابلاغ کے نمائندوں کے لئے بلائی گئی پریس کانفرنس سے خطاب کرتے ہوئے چیف الیکشن کمشنر نے کہا کہ بلدیاتی انتخابات میں اگر کوئی سیاسی جماعت کسی امیدوار کی انتخابی مہم چلاتی ہے یا اسے پیسے دیتی ہے تو یہ الیکشن کمیشن کے ضابطہ اخلاق کی خلاف ورزی ہے اور اس بارے میں کارروائی کی جا سکتی ہے۔ تاہم انہوں نے کہا صدر تو ملک کے سربراہ ہیں اور وہ سیاسی آدمی نہیں ہیں لہذا وہ سیاسی عمل سے بالاتر ہیں۔

انہوں نے کہا کہ صدر کسی مخصوص امیدوار کی انتخابی مہم نہیں چلا رہے اور بلدیاتی انتخابات میں صدر کی مداخلت بالواسطہ نہیں ہے۔ انہوں نے پھر کہا کہ صدر ساری قوم کے ہیں۔ انہوں نے کہا کہ اس سلسلے میں کسی سیاسی جماعت کے خلاف بھی کارروائی نہیں کی جا سکتی کیونکہ الیکشن تو غیر جماعتی بنیادوں پر ہو رہے ہیں۔

اس سے قبل بلدیاتی انتخابات کے بارے میں بریفنگ دیتے ہوئے چیف الیکشن کمشنر نے کہا کہ انہوں نے ان انتخابات کو شفاف اور غیر جانبدارانہ بنانے کے لئے بہت سے اقدامات کئے ہیں۔ ان اقدامات کا ذکر کرتے ہوئے جسٹس ڈوگر کا کہنا تھا کہ انہوں نے الیکشن کمیشن کی جانب سے بلدیاتی انتخابات کا شیڈول کے اعلان کے بعد تریسٹھ سرکاری افسران کے تبادلے اور تقرریوں کو کالعدم قرار دیا ہے۔

تاہم انہوں نے اس سوال کا جواب دینے سے بھی گریز کیا کہ اس الیکشن میں کئی حلقوں میں حکومتی امیدواروں کی انتخابی مہم کے لئے سرکاری مشینری کا استعمال کیا جا رہا ہے۔ ان کا کہنا تھا کہ انہوں نے بہت سے شکایات پر کارروائی کی ہے جس کے بعد اس الیکشن پر حزب اختلاف کی سیاسی جماعتوں کا اعتراض بلا جواز ہے۔

الیکشن کمشنر کا یہ بھی کہنا تھا کہ انہوں نے صوبائی و ضلعی پولیس افسران اور ضلعی ریٹرننگ آفسران سے سیاسی زیادتی،امیدواروں کے اغوا، پولیس کے جبر اور جھوٹے مقدمات کے اندراج کا نوٹس لیا تھا مگر اس سلسلے میں جب رپورٹس آئیں تو ان میں سے زیادہ تر میں یہ ثابت ہوا کہ ایسے واقعات سرے سے ہوئے ہی نہیں۔