مبشر زیدی بی بی سی اردو ڈاٹ کام، اسلام آباد

صدر مشرف نے کہا ہے جو مدرسہ رجسٹریشن نہیں کرائے گا اس کے خلاف کارروائی کی جائے گی

جنرل پرویز مشرف نے راولپنڈی میں ایک پریس کانفرنس سے خطاب کرتے ہوئے کہا کہ ان کی حکومت گذشتہ ہفتے ملک میں کالعدم مذہبی تنظیموں کے خلاف آپریشن میں سنجیدہ ہے اور قانون نافذ کرنے والے اداروں کو ہدایات جاری کی گئی ہیں کہ وہ ان تنظیموں کے عام کو پکڑنے کی بجائے اہم لوگوں کو پکڑیں۔

صدر نے اپنی پریس کانفرنس میں لندن بم دھماکوں کے تناظر میں پاکستان میں چند گرفتاریوں کی تصدیق تو کی ہے مگر ان کا کہنا ہے کہ ابھی تک ان دھماکوں میں کسی کے ملوث ہونے کا ثبوت نہیں ملا ہے۔

جنرل مشرف نے کہا ہے کہ تمام ممالک کو آپس میں انٹیلیجنس معلومات کا تبادلہ کرنا چاہیے تاکہ دنیا بھر میں کہیں بھی دہشت گرد کارروائی کو روکا جا سکے۔

انہوں نے کہا کہ پاکستان میں القاعدہ کی مرکزی طاقت کو ختم کر دیا ہے اور خاص طور پر ابو فراج اللبی کی گرفتاری کے بعد پتہ چلا ہے کہ القاعدہ روابط کے لیے کوریئر سروس کا استعمال کر رہی تھی۔ انہوں نے کہا ہے کہ ہم اس کوریئر نیٹ ورک میں داخل ہو گئے ہیں اور ابو فراج سے امریکی انٹیلیجنس حکام کی تفتیش کے بعد پتہ چلا ہے کہ ابو فراج کو القاعدہ کی مرکزی قیادت سے رابطے میں دو سے تین مہینے کا وقت لگتا تھا۔

انہوں نے کہا کہ ان کے خیال میں یہ درست نہیں ہے کہ اس صورتحال میں القاعدہ دنیا بھر میں ہونے والی دہشت گردی کروا رہی ہے۔ انہوں نے کہا کہ اسامہ بن لادن اورایمن الزواہری ان دہشت گردی کے واقعات کے واقعات میں ملوث ہوتے اور ان کے روابط دنیا بھر میں ہوتے تو پاکستان کی خفیہ ایجنسیاں ان کو گرفتار کر چکی ہوتیں۔

صدر کا کہنا تھا کہ ان کے خیال میں القاعدہ ایک فلسفہ بن گئی ہے اور کوئی بھی تنظیم القاعدہ کا نام لے کر دہشت گردی کی کارروائی کی ذمہ داری القاعدہ پر ڈال دیتی ہے۔

انہوں نے کہا کہ پاکستان کی زیادہ تر آبادی مذہبی تو ہے مگر وہ اعتدال پسند بھی ہے۔انہوں نے کہا کہ ایک چھوٹی سی اقلیت جیش، لشکر اور سپاہ کے نام پر ملک میں انتہا پسندی اور دہشت گردی کر رہی ہیں۔