ریاض سہیل بی بی سی اردو ڈاٹ کام، کراچی

کراچی میں حساس پولنگ سٹیشنوں پر خفیہ کیمرے لگائے جانے کا فیصلہ کیا گیا ہے۔

سندھ کے دارالحکومت کراچی میں حساس ترین پولنگ اسٹیشنوں کے پاس مقامات پر ویڈیو کیمرے لگانے اور پولیس کے ون فائی مرکز کو الیکشن شکایت سیل میں تبدیل کرنے کا فیصلہ کیا گیا ہے۔

بدھ کے روز رینجرز اور پولیس کے افسران کے اجلاس میں بلدیاتی اتخابات کو پرامن طریقے سے کرانے کے بارے میں انتظامات کا جائز ہ لیا گیا۔

کراچی میں پر امن اور غیر جانبدارانہ انتخابات کے بارے میں مختلف سیاسی جماعتیں اور گروپ شکوک کا اظہار کر چکے ہیں۔ ان کا کہنا ہے کہ موجودہ صوبائی انتخابات غیر جانبدارانہ نہیں ہو سکتے۔ لہذا یہ انتخابات فوج کی نگرانی میں کرائے جائیں۔

حکومت کی حلیف جماعت ایم کیو ایم فوج کی تعینات کے حق میں نہیں ہے۔ لہذا حکومت نے پولیس اور رینجرز کی نگرانی میں انتخابات کرانے کا فیصلہ کیا ہے اور مدد کے لیے معاوضے پر نجی سیکیورٹی گارڈ حاصل کرنے کا فیصلہ کیا ہے۔

جبکہ وفاقی وزیر داخلہ آفتاب شیر پاؤ نے بھی کراچی کے دورے کے موقع پر کہا تھا کہ انتخابات میں رینجرز کا اہم کردار ہوگا۔

سندھ پولیس کے مطابق کراچی کے نوے فیصد پولنگ سٹیشن حساس ہیں ۔

اجلاس میں طے کیا گیا کہ پولیس کے شکایتی ومددگار سیل ون فائیو کو الیکشن کے لئے شکایت سیل میں تبدیل کر دیا جائےگا۔

اس کے علاوہ الیکشن میں کسی بھی بدامنی اور بد انتظامی کو روکنے کے لیے ویڈیو کیمرے استعمال کئے جائیں گے۔

موقع پر موجود موبائل فورس کے علاوہ کچھ مقامات پر خفیہ کیمرے نصب کئے جائیں گے۔ تاکہ ناخوشگوار واقع کے ذمہ دار افراد کو چھپنے کا موقع نہ ملے۔