اعجاز مہر
بی بی سی اردو ڈاٹ کام، اسلام آباد |  |
|  الیکشن کمشنر نے امریکی کو سفیر کو انتخابات کے بارے میں بتایا |
پاکستان کے چیف الیکشن کمشنر جسٹس عبدالحمید ڈوگر نے کہا ہے کہ ملک میں بلدیاتی انتخابات رواں سال میں دو مراحل میں ہوں گے اور جولائی کے پہلے ہفتے سے انتخابات کا انعقاد شروع ہوگا۔ انہوں نے تاریخ کا اعلان نہیں کیا۔ جسٹس ڈوگر نے یہ بات بدھ کو امریکی سفیر ریان سی کرورکر کو ایک ملاقات کے دوران بتائی۔ چیف الیکشن کمشنر نے کہا کہ کمیشن ملک بھر میں شفاف اور غیرجانبدارانہ بنیاد پر انتحابات کے انعقاد کو یقینی بنانے کے لیے اقدامات کر رہا ہے۔ الیکشن کمیشن کے سیکریٹری کنور دلشاد نے بی بی سی بات کرتے ہوئے کہا کہ دونوں مراحل اگست کے وسط تک مکمل کیے جائیں گے اور اس ضمن میں تیاریاں جاری ہیں۔ پاکستان میں اس سال بلدیاتی انتخابات منعقد ہونے کے بارے میں خاصا ابہام تھا اور خدشات بھی پائے جارہے تھے کہ شاید یہ انتخابات نہیں ہوں گے۔ چند ماہ پہلے حکام نے کہا تھا کہ اپریل سے ملک میں بلدیاتی انتخابات کا انعقاد شروع ہوگا لیکن اپریل قریب آنے کے باوجود کسی تاریخ کا اعلان نہیں ہوا تھا۔ انتخابات ملتوی ہونے کے خدشات کو گزشتہ چند ہفتوں کے دوران حکومت اور پیپلز پارٹی کے درمیان رابطوں کے تناظر میں قیاس آرائیوں پر مبنی خبروں سے مزید تقویت ملی تھی۔ چیف الیکشن کمشنر نے کسی تاریخ کا اعلان تو نہیں کیا لیکن ایک مدت کا تعین کردیا ہے جس سے ملک میں پائے جانے والے خدشات ختم ہوں گے اور سیاسی جماعتوں کی انتخابی سرگرمیاں بھی شروع ہوں گی۔ صدر جنرل پرویز مشرف کی جانب سے اختیارات کی نچلی سطح تک منتقلی کے پروگرام کے تحت متعارف کرائی گئی اصلاحات کے نتیجے میں ضلعی حکومتوں کا نظام قائم ہوا تھا۔ اس نئے نظام کے تحت منعقد ہونے والے یہ دوسرے انتخابات ہوں گے۔ ماضی میں بلدیاتی انتخابات کے انعقاد کی ذمہ داری صوبائی حکومتوں کی تھی لیکن نئے نظام کے تحت یہ کام الیکشن کمیشن کو سونپا گیا ہے۔ کمیشن کے سیکریٹری نے بتایا ہے کہ نظرثانی شدہ ووٹر فہرستیں حال میں شائع کردی گئی ہیں جبکہ رٹرننگ افسران کی تقرری سمیت دیگر انتظامات کیے جارہے ہیں۔ | 
یہ صفحہ دوست کو ای میل کیجیئے
پرِنٹ کریں
