ہارون رشید بی بی سی اردو ڈاٹ کام، پشاور

شمالی وزیرستان میں اتمانزئی قبائل کا گرینڈ جرگہ میرعلی میں ایپی غنڈئی میں ہوا

ادھر ایجنسی کے صدر مقام میران شاہ میں نامعلوم افراد نے کل رات فوجی ٹھکانوں پر چھ راکٹوں سے حملہ کیا تاہم کسی جانی نقصان کی اطلاع نہیں ملی ہے۔

شمالی وزیرستان میں اتمانزئی قبائل کا گرینڈ جرگہ میرعلی میں ایپی غنڈئی کے مقام پر اتوار کی صبح ہوا۔ عینی شاہدین کے ایک اندازے کے مطابق اس میں تقریبا ڈیڑھ ہزار افراد نے شرکت کی۔

اس موقعہ پر اہم رہنماؤں میں قبائلی چیف ملک قادر خان، رکن قومی اسمبلی مولانا نیک زمان، سینٹر متین شاہ اور سابق رکن قومی اسمبلی مولانا دیندار موجود تھے۔

مقررین نے اپنے خطاب میں واضع کیا کہ وہ فوج کے ساتھ غیرملکیوں کو اپنے علاقے میں پناہ نہ دینے کے معاہدے پر اب بھی قائم ہیں۔ ان کا کہنا تھا کہ حکومت نے اب تک کوئی ایک ایسا مکان نہیں دکھایا جہاں سے غیرملکی برآمد ہوا ہو تاہم سڑکوں اور سرحد پر نظر رکھنا حکومت کی ذمہ داری ہے ان کی نہیں۔

انہوں نے شک کا اظہار کیا کہ افغانستان میں شمالی اتحاد کی اکثریت والی حکومت قبائلی علاقوں میں بدامنی کی کوشش کر رہی ہے۔

قبائلیوں نے فوج سے مطالبہ کیا کہ وہ ترقیاتی کاموں کی بجائے سرحدات کی نگرانی پر ذیادہ توجہ دے۔ ان کا مطالبہ تھا کہ ترقیاتی منصوبے مقامی انتظامیہ کے حوالے کیے جائیں۔

تقریبا ڈیڑھ گھنٹے تک جاری رہنے والے اس جرگے میں قبائلیوں نے واضع کیا کہ انہیں اعتماد میں لیے بغیر فوجی کارروائی میں نقصان کے وہ ذمہ دار نہیں ہونگے۔