ریاض سہیل بی بی سی اردو ڈاٹ کام کراچی

تین سال قبل اسی تنازعہ میں تین افراد قتل ہوگئے تھے

یہ واقعہ اس وقت پیش آیا جب شنبھانی قبیلے کے لوگ ایک ڈاٹسن گاڑی میں روھڑی سیشن کورٹ میں ایک مقدمے کی سنوائی پر جا رہے تھے۔

کندھرا کے قریب مسلح افراد نے ان کو روک کر فائرنگ کی ۔جس میں سات افراد ہلاک ہوگئے۔

مقتولین کی شناخت بادشاہ ڈنو، میل خان، سبحان علی، موٹن خان، میرو خان، الھجڑیو اور عاشق کے طور پر کی گئی ہے جو سارے ایک ہی خاندان سے تعلق رکھتے ہیں۔

کندھرا پولیس کا کہنا ہے کہ دونوں فریق ماموں بھانجا ہیں جن میں زرعی زمین کے مالکانہ حق پر تنازعہ چل رہا تھا۔

واردات ایک پلاننگ کے تحت کی گئی اور ملزمان واردات کے بعد اپنے گھر خالی کرکے فرارہوگئے ہیں۔

پولیس نے بتایا کہ فریقین میں تین سال قبل بھی جھگڑا ہوا تھا جس میں تین افراد ہلاک ہوگئے تھے۔ وہ مقدمہ ابھی زیر سماعت ہے۔

واضح رہے کہ سکھر میں دو ماہ قبل زمین کے تنازعہ میں چھ افراد قتل ہوگئے تھے۔ لکھن قبیلے کے لوگ عدالت میں سنوائی پر جارہے تھے کہ مہر قبیلے کے لوگوں نے حملہ کیا۔

زمین پر حق ملکیت پر فریقین میں چلنے والے تنازعات پورے قبیلے کے تنازعہ میں تبدیل ہوجاتے ہیں۔