فرنٹیئر کور کے کمانڈر کو امید ہے کہ یہ وفد فوجیوں کا محاصرہ کیے ہوئے قبائلیوں کو واپس جانے پر راضی کر لے گا

بلوچستان کے علاقے ڈیرہ بگٹی میں مقامی مسلح قبائیلیوں نے فرنٹئیر کانسٹیبلری کے تین سو زائد اہلکار کو ایک قلعے میں محصور کر رکھا ہے۔

فرنٹیئر کور کے کمانڈر بریگیڈیئر سلیم نواز نے سوئی میں صحافیوں سے بات کرتے ہوئے کہا کہ ’ حالات پر جلد از جلد قابو پانے کی ضرورت ہے تاکہ ممکنہ بحران سے بچا جا سکے۔

انہوں نے یہ بھی کہا کہ’ ہمارے پاس مکمل طاقت ہے کہ ہم انہیں ختم کر سکیں لیکن حالات کو بگڑنے سے بچانے کے لیے ہم مکمل محتاط رویہ اختیار کیے ہوئے ہیں۔‘

یہ خدشہ اس وقت ظاہر کیا گیا ہے جب پاکستان کے پارلیمانی اراکین کا ایک وفد بگتی قبیلے کے دورے پر ہے۔ اس دورے کا مقصد ’حقائق کا کھوج‘ لگانا ہے۔

یہ گروپ بگتی قبیلے کے سردار اکبر بگتی سے بھی ملاقات کرے گا۔ اکبر بگتی بلوچستان کے طاقتور بگتی قبیلے کے سردار ہیں اور وہ بلوچستان کی خود مختاری اور سوئی گیس کی رائلٹی میں زیادہ حصے کا مطالبہ کرتے ہیں۔

یہ وفد سردار اکبر بگتی کے اس دعویٰ کی صداقت کا جائزہ لینے کی کوشش کرے گا جس میں انہوں نے کہا ہے کہ نیم فوجی دستوں کی فائرنگ سے ان کے قبیلے کے پچاس افراد ہلاک ہوئے ہیں۔ پاکستانی حکام اس دعوی کو جھوٹ قرار دیتے ہیں اور ان کا کہنا ہے کہ مرنے والے افراد کی تعداد کو بڑھا چڑھا کر پیش کیا گیا ہے۔

’سکیورٹی دستوں نے دانستہ طور پر ان جھڑپوں کا آغاز کیا تا کہ علاقے میں فوجی آپریشن کا جواز پیدا کیا جا سکے‘

پندرہ رکنی وفد میں حکومت اور اپوزیشن کے اراکین کے علاوہ اخبار نویسوں کا ایک گروپ بھی شامل ہے۔ فرنٹیئر کور کے کمانڈر کو امید ہے کہ یہ وفد فوجیوں کا محاصرہ کیے ہوئے قبائلیوں کو واپس جانے پر راضی کر لے گا۔

پاکستانی حکام بگتی پر حالیہ جھڑپوں کو ہوا دینے کا الزام عائد کرتے ہیں اور اس سلسلے میں اکبر بگتی پر قتل کا ایک مقدمہ بھی قائم کیا گیا ہے۔

اکبر بگتی اس الزام سے انکار کرتے ہیں کہ ان کے آدمیوں نے فوجی قافلے پر حملہ کیا اور ان کا کہنا ہے کہ سکیورٹی دستوں نے دانستہ طور پر ان جھڑپوں کا آغاز کیا تا کہ علاقے میں فوجی آپریشن کا جواز پیدا کیا جا سکے۔

ڈیرہ بگتی جانے والے وفد میں شامل بی بی سی کے نمائندے ظفر عباس کا کہنا ہے کہ انہوں نے سوئی سے ڈیرہ بگتی تک سینکڑوں قبائلیوں کو سڑک کے کنارے صف بندی کیے ہوئے دیکھا۔

انہوں نے یہ بھی بتایا کہ وفد کے قافلے کو کسی نے نہیں روکا لیکن اس کی وجہ صرف یہ تھی کہ اکبر بگتی نے قبائلیوں کو وفد کی آمد کے بارے میں پہلے سے ہی مطلع کر دیا تھا۔

حکام کا کہنا ہے کہ گزشتہ پانچ دن میں یہ پہلا موقع ہے کہ انہوں نے اس سرک پر سفر کیا ہو اور ان پر حملہ نہ ہوا ہو۔ بی بی سی کے نمائندے کا یہ بھی کہنا ہے کہ حالات اتنے کشیدہ ہیں کہ کبھی بھی جھڑپیں شروع ہو سکتی ہیں۔

بلوچستان میں گزشتہ ہفتے ہونے والی جھڑپوں کے بعد نیم فوجی دستوں کے تین سو سے زیادہ اہلکار قبائلیوں کے گھیرے میں ہیں۔ ان جھڑپوں میں اب تک تیئیس افراد ہلاک ہو چکے ہیں۔