مبشر زیدی بی بی سی اردو ڈاٹ کام، اسلام آباد

پر ٹی سی ایل کے دفتر پر سخت حفاظتی انتظامات

پاکستان کا نجکاری کمیشن ہفتے کی شام اس نجکاری کے لئے جمع کرائی گئی بولیاں ایک مقامی ہوٹل میں کھولے گا۔

اس نجکاری میں سنگاپور کی سنگ ٹیل، متحدہ عرب امارات کی ایتیصلات اور چین کی چائنہ موبائل کے درمیان پی ٹی سی ایل کے چھبیس فی صد حصص اور انتظامی امور سنبھالنے کے لئے مقابلہ ہو رہا ہے۔

یہ نجکاری پہلے دس جون کو ہونی تھی مگر پی ٹی سی ایل کے نجکاری مخالف ملازمین کی یونین اور پی ٹی سی ایل انتظامیہ کے درمیان شدید اختلافات پیدا ہو گئے تھے جس کے بعد حکومت کی درخواست پر نیم فوجی دستوں نے ملک کی تمام مواصلاتی تنصیبات کا کنٹرول سنبھال لیا تھا۔

قانون نافذ کرنے والے اداروں نے سینکڑوں نجکاری مخالف ملازمین کو بھی حراست میں لیا تھا۔

تاہم اب حکومت کا دعوی ہے کہ اس نے نجکاری مخالف ملازمین کی یونین کے ساتھ تمام معاملات طے کر لئے ہیں اور ان کے لئے پانچ ارب روپئے کا مراعتی پیکج دینے کا اعلان بھی کیا ہے۔

نجکاری مخالف ملازمین نے خدشہ ظاہر کیا ہے کہ نجکاری کے بعد بہت سے ملازمین کو برخواست کر دیا جائے گا۔پی ٹی سی ایل میں اکتہر ہزار ملازمین کام کرتے ہیں۔

نجکاری مخالف ملازمین کا کہنا ہے کہ پی ٹی سی ایل ایک منافعہ بخش ادارہ ہے اور اس کی نجکاری ناقابل فہم ہے۔

آج تمام مواصلاتی تنصیبات پر سیکیورٹی کے انتظامات سخت کر دئے گئے ہیں اور اسلام آباد کی ٹیلی فون ایکسچینجوں سے ملحقہ سڑکوں پر پولیس نے رکاوٹیں کھڑی کر دی ہیں تاکہ نجکاری مخالف ملازمین وہاں کسی قسم کا مظاہرہ نہ کر سکیں۔

ٹیلی فون ایکسچینجوں کے اندر رینجرز کے اہلکار تعینات کئے گئے ہیں جو ایکسچینج کے اندر نجکاری مخالف ملازمین اور عام آدمیوں کو جانے کی اجازت نہیں دے رہے۔

چند نجکاری مخالف یونینوں نے نجکاری کے موقع پر ہڑتال کا اعلان بھی کیا ہے مگر ابھی تک ملک کے کسی حصے سے کسی قسم کے مظاہرے کی اطلاعات نہیں ملی ہیں۔

پاکستان کی پارلیمان میں بھی گذشتہ ایک ہفتے سے پی ٹی سی ایل کی نجکاری کا موضوع زیر بحث رہا ہے اور حزب اختلاف کی تمام جماعتوں نے اس نجکاری کی مخالفت کی ہے ۔

انہوں نے اعلان کیا ہے کہ اگر مستقبل میں ان کی حکومت آئی تو وہ اس نجکاری کو کالعدم قرار دے دیں گے اور پی ٹی سی ایل کو دوبارہ حکومتی کنٹرول میں دیا جائے گا۔