عزیزاللہ خان
بی بی سی اردو ڈاٹ کام کوئٹہ |  |
|  نواب اکبر بگٹی اور شیری رحمٰن صحافیوں سے بات چیت کے دوران |
جمہوری وطن پارٹی کے قائد نواب اکبر بگٹی نے بلوچ قوم پرست جماعتوں کے قائدین اور دیگر ہم خیال قوتوں سے کہا ہے کہ وہ پارلیمانی طرز سیاست چھوڑ کر ایک متحدہ سیاسی تنظیم قائم کر کے بلوچوں کے حقوق کے لیے عملی جدوجہد کریں۔ اس کے لیے انھوں نے کہا ہے کہ وہ اپنی جماعت جمہوری وطن پارٹی کو تحلیل کرنے کے لیے تیار ہیں۔ کوئٹہ پریس کلب میں ٹیلیفونک پریس کانفرنس سے خطاب کرتے ہوئے نواب اکبر بگٹی نے کہا ہے کہ نئی سیاسی تنظیم کے ذریعے مروجہ طرز سیاست کے بر عکس عملی جدو جہد کے ذریعے فیصلہ کن کردار ادا کیا جائے اس کے لیے چار بلوچ قوم پرست جماعتوں سمیت دیگر گروہ یا شخصیات کا اپنی جداگانہ سیاسی حیثیت کے خاتمے کے بعد نئی سیاسی تنظیم کا اعلان کیا جائے گا۔ ایک سوال کے جواب میں انھوں نے کہا ہے کہ نئی تنظیم حقوق کے حصول کے لیے تمام اقدامات کرے گی اور ایک مرتبہ نئی تنظیم قائم ہو جائے اس کے بعد قیادت کا مسئلہ حل ہو جائے گا۔
اخباری کانفرنس میں انھوں نے کہا ہے کہ بلوچستان عملاً فوج کا ایک مفتوحہ علاقہ بن چکا ہے جس میں ماضی اور حال کے فوجی آپریشن سمیت مستقبل میں بھی بچنے کے آثار دکھائی نہیں دیتے۔ بلوچستان میں چار بلوچ قوم پرست جماعتوں کا اتحاد قائم ہے جس میں جمہوری وطن پارٹی کے علاوہ سردار عطاءاللہ مینگل کی بلوچستان نیشنل پارٹی ڈاکٹر عبدالحئی بلوچ کی نیشنل پارٹی خیر بخش مری کی حق توار شامل ہے جبکہ قوم پرست جماعتوں کا ایک اور اتحاد پونم قائم ہے۔ اس بارے میں جب نواب اکبر بگٹی سے پوچھا تو انھوں نے کہا کے اتحاد تو کام کر رہے ہیں لیکن اس وقت ضرورت تقسیم ہو کر نہیں بلکہ متحد ہو کر جدوجہد کرنے کی ہے اور ایک نئی سیاسی جماعت قائم کرنا چاہیے۔ ڈیرہ بگٹی کے صورتحال کا ذکر کرتے ہوئے انھوں نے کہا ہے کہ علاقے میں کشیدگی جاری ہے اور دونوں جانب سے مسلح افراد کی انگلیاں لبلبی پر ہیں۔ ان سے جب پوچھا کے کیا وفاقی حکومت سے جاری مذاکرات کا راستہ تو بند کر دیا گیا ہے تو انھوں نے کہا ہے کہ مذاکرات کا سوال نہیں ہے نہ مذاکرات کا تعلق ہے یہ اندرونی مسئلہ ہے کہ ہم ٹکڑیوں میں تقسیم ہیں نئی تنظیم اگر قائم ہو جاتی ہے تو پھر مذاکرات کے حوالے سے فیصلہ اس وقت مشترکہ طور پر کیا جائے گا۔ | 
یہ صفحہ دوست کو ای میل کیجیئے
پرِنٹ کریں
