ہارون رشید بی بی سی اردو ڈاٹ کام، پشاور

عزت کے نام پر ہونے والے قتل کے واقعات کے خلاف احتجاج (فائل فوٹو)

ڈیرہ اسماعیل خان کی کُلاچی تحصیل کے گرہ اسلم علاقے میں پولیس نے گزشتہ دنوں ایک سترہ سالہ قمرالنساء کو عزت کے نام پر قتل کرنے کے شک میں اس کے پوسٹ مارٹم کا حکم دیا تھا۔ پولیس کو شک تھا کہ اس عورت کو مبینہ طور پر اس کے بھائیوں نے قتل کر کے دفنا دیا تھا۔

پولیس کے مطابق ایک مقامی شخص صالح محمد کی انیس سالہ بیٹی قمرالنساء اس ماہ کی بارہ تاریخ کو گھر سے کسی بات پر ناراض ہوکر چلی گئی۔ اطلاعات کے مطابق بعد میں اسے گولی مار کر ہلاک کر کے بغیر کسی پولیس رپورٹ کے دفنا دیا گیا۔

چند روز بعد یہ بات گھر سے باہر نکلی اور علاقے کے لوگوں اور حقوق انسانی کی تنظیموں نے اسے عزت کے نام پر قتل قرار دیتے ہوئے اس کی تحقیقات کا مطالبہ کیا۔

ان مطالبات اور اخباری خبروں کا نوٹس لیتے ہوئے دپٹی انسپکٹر جنرل ڈیرہ اسماعیل خان ذولفقار احمد چیمہ نے متعلقہ تھانے کو مجاز عدالت سے اجازت لے کر اس عورت کی قبر کھود کر لاش کا پوسٹ مارٹم کرانے کا حکم دیا۔

قبر کی کھدائی کے بعد لاش کا پوسٹ مارٹم کیا گیا جس میں یہ بات ثابت ہوگئی کہ قمرالنساء کو کنپٹی پر پستول سے گولی مار کر ہلاک کیا گیا تھا۔

اس رپورٹ کے سامنے آنے پر پولیس نے والد صالح خان اور بھائی ممتاز خان کے خلاف مقدمہ درج کرلیا ہے۔ ان میں سے ایک کو پولیس نے پہلے ہی گرفتار کر چکی ہے۔