علی سلمان
بی بی سی اردو ڈاٹ کام لاہور |  |
|  صوبائی اسمبلی نے ٹیکس کے خاتمے کو قانونی شکل بھی دے دی ہے |
پاکستانی پنجاب میں پانچ مرلے تک کے رہائشی مکانوں پرعائد پراپرٹی ٹیکس ختم کر دیا گیا ہے۔ آج پنجاب اسمبلی نےاس سلسلہ میں باقاعدہ قانون بھی منظور کر لیا ۔ وزیر اعلی پنجاب چودھری پرویز الہی نے چند ماہ پہلے اس ٹیکس کے خاتمے کا اعلان کیا تھا اور پنجاب اسمبلی میں حزب اختلاف نے اس سلسلہ میں ایک قرارداد بھی پیش کی تھی جو سٹینڈنگ کمیٹی کے سپرد کر دی گئی تھی۔ آج صوبائی وزیرایکسائز چودھری شفیق نے مسودۂ بل منظوری کے لیے پیش کرتے ہوئے بتایا کہ پانچ مرلے تک کے مکانوں سے حکومت کو سالانہ پچاس کروڑروپےتک ٹیکس ملتا تھا جو اب نہیں ملےگا لیکن اس کا فائدہ براہ راست لاکھوں شہریوں کو ہوگا۔انہوں نے بتایا کہ یہ قانون جولائی دوہزارچار سے نافذالعمل ہوگا۔ مسلم لیگ نواز سےتعلق رکھنے والے ڈپٹی اپوزیشن لیڈر رانا ثناءاللہ نے کہاکہ یہ اس ٹیکس کی معافی کی قرارداد اپوزیشن نے پیش کی تھی اور اس وقت ایوان میں سے صرف وزیر ایکسائز نےاس کی مخالفت کی تھی۔ انہوں نے کہا کہ اپوزیشن ، وزیر اعلی پنجاب کاشکریہ ادا کرتی ہے کہ انہوں نے اپنے وزیروں کی مخالفت کے باوجود اپوزیشن کی قرارداد کو قانون بنایا۔ انہوں نے کہا کہ وہ امیدظاہرکرتے ہیں کہ حکومت اب حزب اختلاف کے علاقوں کے روکے گئےترقیاتی فنڈز بھی جاری کر دے گی۔ | 
یہ صفحہ دوست کو ای میل کیجیئے
پرِنٹ کریں
