عدنان عادل
بی بی سی اردو ڈاٹ کام، لاہور |  |
|  تازہ قانون کے تحت بچوں سے بھیک منگوانے پر تین سال قید کی سزا دی جاسکے گی |
پنجاب اسمبلی نے بے سہارا اور نظر انداز کیے گئے بچوں کی بہبود سے متعلق ایک مسودہ قانون کی منظوری دی ہے۔ یہ بل صوبائی وزیر قانون راجہ بشارت نے اسمبلی میں پیش کیا۔انہوں نے کہا کہ حکومت نے اقوام متحدہ کے انیس سو نوے کے بچوں کے حقوق سے متعلق کنوینشن کی توثیق کی ہے اس لیے وہ یہ قانون لانے کی پابند ہے۔ سرکاری اعداد و شمار کے مطابق پاکستان میں اٹھارہ سال سے کم عمر کے بچے پندرہ کروڑ آبادی کا تینتالیس فیصد ہیں۔پانچ اور نو سال کی عمر کے درمیان کے ساٹھ لاکھ بچے سکول نہیں جاتے۔ انسانی حقوق کمیشن براۓ پاکستان کے مطابق ملک میں دس سے چودہ سال کی عمر کے اٹھارہ فیصد بچے مزدوری کرتے ہیں حالانکہ قانون ا س کی اجازت نہیں دیتا۔ پنجاب میں منظور کیے گئے نئے قانون میں کہا گیا ہے کہ بچوں سے بھیک منگوانے والے کو تین سال قید اور پچاس ہزار روپے جرمانہ کی سزا دی جاسکے گی۔ اس قانون کے تحت بے سہارا اور نظر انداز کیے گئے بچوں کی بہبود اور تحفظ کے لیے ایک بیورو قائم کیا جائے گا جو مختلف علاقوں میں بچوں کی بہبود کے ادارے قائم کر سکے گا۔ اس قانون کے تحت بچوں کے تحفظ کے لیے عدالتیں بھی قائم کی جائیں گی اور بیورو بچوں کے حفاظتی آفیسر کا تقرر کرسکے گا۔ یہ افسر جو کسی بے سہارا بچہ کو تحویل میں لینے کے چوبیس گھنٹہ کے اندر اندر بچوں کی عدالت میں پیش کرے گا۔ اس قانون کے تحت حکومت ان بچوں کو اپنی تحویل میں لے سکے گی جن کے والدین ان کی بہبود اور تحفظ مہیا نہ کر رہے ہوں۔ ایسے بچوں کو بے سہارا اور محتاج تصور کیا جاۓ گا جو بے گھر ہوں یا جن پر ماں باپ کا کنٹرول نہ ہو اور وہ کسی بدکاری کے اڈے میں رہائش پذیر ہوں۔ پنجاب اسمبلی نے مسودہ قانون میں حزب اختلاف کی ایک ترمیم بھی منطور کرلی جس کے مطابق بچوں کی حفاظت اور بہبود کے لیے بنائے گئے بیورو میں اسمبلی کے دو رکن حکومتی جماعت سے اور ایک حزب اختلاف سے لیا جائے گا۔ | 
یہ صفحہ دوست کو ای میل کیجیئے
پرِنٹ کریں
