عدنان عادل بی بی سی اردو ڈاٹ کام، لاہور

پنجاب اسمبلی

ہارون اختر خان وفاقی وزیر تجارت ہمایوں اختر خان کے چھوٹے بھائی اور آئی ایس آئی کے سابق سربراہ جنرل اختر عبدالرحمٰن کے صاحبزادے ہیں۔

لاہور ہائی کورٹ کے الیکش ٹریبیونل کے جج جسٹس میاں حامد فاروق نے انتخاب میں لاہور کے حقلہ ایک سو چھپن سے دوسرے نمبر پرکامیاب ہونے والے امیدوار ہارون اختر خان کی درخواست کو منظور کرتے ہوئے امجد عزیز کے انتخاب کو منسوخ کردیا۔

جج نے فیصلہ میں لکھا ہے کہ ان کی جگہ ہارون اختر منتخب اور رکن اسمبلی ہیں۔

شیخ امجد عزیز کے انتخاب کو ان کے پاس بی اے کی ڈگری نہ ہونے کی بنیاد پر چیلنج کیا گیا تھا۔ شیخ امجد عزیز نے کاغذات نامزدگی جمع کراتے ہوئے کہا تھا کہ ان کی بی اے کی ڈگری گم ہوگئی تھی۔

تاہم درخواست گزار کے وکیل اعجاز احمد اعوان کا کہنا تھا کہ شیخ امجد عزیز نے ایف ایس سی بھی نہیں کیا تو وہ بی اے کیسے کرسکتے تھے۔

وکیل کا کہنا تھا کہ پنجاب یونیورسٹی کےکسی بی اے کے نتیجہ میں یہ نہیں ہے کہ انہوں نے بی اے پاس کیا ہے۔

پاکستان میں متعدد منتخب ارکان اسمبلی کے خلاف الیکشن ٹریبیونلز میں اس بنیاد پر درخواستیں زیرسماعت ہیں کہ ان کی بی اے کی اسناد جعلی ہیں یا وجود ہی نہیں رکھتیں۔

حال ہیں میں وفات پانے والے وفاقی وزیر عبدالستار لالیکا کے خلاف بھی ایک ہی درخواست زیرسماعت تھی۔

متحدہ مجلس عمل کے ساٹھ سے زیادہ ارکان پارلیمان پر اس بنیاد پر سپریم کورٹ میں ایک درخواست زیر التوا ہے کہ ان کی اسناد مدرسوں سے جاری ہوئیں ہیں جن کا مرتبہ بی اے کے برابر نہیں ہے اس لیے انہیں نااہل قرار دے دیا جائے۔