اعجاز مہر بی بی سی اردو ڈاٹ کام، اسلام آباد

کمیٹی

سنیچر کے روز چودھری شجاعت حسین کی صدارت میں ہونے والے ایک غیر رسمی اجلاس میں مشاورت کے بعد لیفٹیننٹ جنرل ریٹائرڈ مجید ملک کی سربراہی میں تین رکنی کمیٹی بنانے کا فیصلہ کیا گیا۔

کمیٹی میں بلوچستان کے سابق گورنر فضل آغا اور سابق وزیر خارجہ گوہر ایوب کو بھی شامل کیا گیا ہے۔ انہیں ہدایت کی گئی ہے کہ جلد سے جلد وہ صوبہ سندھ کا دورہ کریں، وزیر اعلیٰ ، متعلقہ وزیر، گورنر اور مسلم لیگ کے سرکردہ رہنماؤں اور کارکنوں سے ملاقاتیں کرکے رپورٹ پیش کریں کہ حقائق کیا ہیں۔

بتایا گیا ہے کہ یہ کمیٹی ایک دو دن میں کراچی روانہ ہوگی۔ کمیٹی کی سفارشات کے بعد مسلم لیگ کے صدر پارٹی قیادت سے مشورے کے بعد حتمی فیصلہ کریں گے۔

اجلاس میں وزیراعلیٰ سندھ ارباب علام الرحیم اور برطرف وزیر امتیاز احمد شیخ کو ہدایت کی گئی کہ کمیٹی کی رپورٹ تک وہ ایک دوسرے کے خلاف بیان بازی بند رکھیں۔

واضح رہے کہ صوبہ سندھ کے وزیراعلیٰ ارباب غلام الرحیم نے چند دن قبل اپنی کابینہ کے وزیر برائے ’ریونیو، امتیاز احمد شیخ کو بدعنوانی کے کئی الزامات لگا کر کابینہ سے فارغ کردیا تھا۔

متعلقہ وزیر نے وزیراعلیٰ کے فیصلہ کو ذاتی عناد قرار دیتے ہوئے ان پر جوابی بدعنوانی کے الزامات عائد کیے تھے۔

وزیراعلیٰ کا دعویٰ ہے کہ انہوں نے متعلقہ وزیر کی بدعنوانی کی تفصیلات پر مبنی فائل صدر جنرل پرویز مشرف اور وزیراعظم شوکت عزیز کو پیش کی تھی اور انہیں اعتماد میں لینے کے بعد انہوں نے جناب شیخ کو برطرف کیا۔