رابرٹ گیٹس سی آئی اے کے ڈائریکٹر رہ چکے ہیں

ان خبروں میں جو ذرائع ابلاغ میں سرکاری ذرائع کے حوالے سے دی جا رہی ہیں کہا گیا ہے کہ باراک اوباما کے صدر کا عہدہ سنبھالنے کے بعد کم از کم ایک سال کے عرصے تک رابرٹ گیٹس کو وزیر دفاع رہنے کی پیش کش ہوئی ہے۔

رابرٹ گیٹس کو صدر بش نے دو سال قبل ڈونلڈ رمز فیلڈ کی جگہ وزیر دفاع نامزد کیا تھا۔ وزارتِ دفاع میں یہ تبدیلی عراق میں تشدد کم کرنے میں امریکی فوج کو ناکامی کے پس منظر میں عمل میں لائی گئی تھی۔

رابرٹ گیٹس وزارتِ دفاع کا قلمدان سنبھالنے سے قبل امریکی خفیہ ادارے سی ائی اے کے ڈائریکٹر تھے۔

واشنگٹن سے بی بی سی کے نامہ نگار کا کہنا ہے کہ رابرٹ گیٹس کو وزارتِ دفاع میں اچھی کارکردگی دکھانے کی وجہ سے بہت عزت کی نگاہ سے دیکھا جاتا ہے۔

مزید اطلاعات کے مطابق جنرل جیمز جوزن کو جو کہ سابق میرین کمانڈنٹ اور یورپ میں امریکہ اور نیٹو فوج کے کمانڈر رہے ہیں اوباما کا نیشل سیکیورٹی ایڈوائزر مقرر کیا جا رہا ہے۔

باراک اوباما کہہ چکے ہیں کہ وہ اپنی ٹیم میں تجربہ اور صلاحیت کا امتزاج دیکھنا چاہتے ہیں۔