وجاہت مسعود لندن

	صوبہ سرحد کے علاقوں ایبٹ آباد اور مانسہرہ میں کہا جاتا ہے کہ مذہب پسندوں کی اکثریت ہے

پاکستان میں اکتوبر 2005 کے زلزلے کو قریب ایک برس گزر چکا ہے۔ توقعات کے عین مطابق ابتدائی ہفتوں کے جذباتی ردعمل کے بعد سے حکومتی کارکردگی معمول کی سطح اختیار کرچکی ہے۔ صدر پرویز مشرف گزشتہ چھ مہینوں میں متعدد مرتبہ قوم سے مخاطب کیا مگر انہوں نے ایک دفعہ بھی زلزلہ متاثرین کی بحالی کا ذکر تک کرنا مناسب نہیں سمجھا۔ زلزلے کے بعد پیش کیے جانے والے پہلے بجٹ میں بھی زلزلہ زدگان کے لیے کسی اہم اقدام کا اعلان نہیں کیا گیا۔

دوسرے لفظوں میں 80 ہزار افراد کی ہلاکت، لاکھوں زخمیوں اور بےگھر ہونے والوں کی ناقابلِ تصور تباہی کو کسی معمولی واقعے کی طرح فراموش کردیا گیا ہے۔ البتہ دنیا بھر سے زلزلہ زدگان کی مدد کے لیے پہنچنے والے سینکڑوں کارکن ابھی تک ان علاقوں میں موجود ہیں۔ مختلف ممالک اور مذاہب سے تعلق رکھنے والے ان رضاکاروں نے انسانی ہمدردی کی بنیادی پر زلزلے کے ہاتھوں برباد ہونے والوں کی مثالی خدمت کی ہے۔

یہ اشتہار ’تحریکِ اصلاحِ معاشرہ‘ کی طرف سے جاری کیا گیا ہے۔ یہ نکتہ دلچسپ ہے کہ سنہ88 سے سنہ 99 تک جب سیاسی حکومتوں کو گرانا یا کمزور کرنا مقصود ہوتا تھا تو اخبارات میں اشتہاری مہم ’تحریکِ اصلاحِ معاشرہ‘ ہی کے نام سے چلائی جاتی تھی۔ مسلم لیگ )نواز( اور پیپلز پارٹی ایک سے زیادہ مرتبہ اس ’تحریک‘ کی اصلاح سے مستفید ہوچکی ہیں۔

دنیا بھر میں حکومتیں پاکستان جانے والے شہریوں کے لیے ہدایات جاری کرتی ہیں جن میں لباس اور معاشرتی معمولات پر خاص زور دیا جاتا ہے۔ مغربی شہری خود اپنے تحفظ کے نکتہ نظر سے ان ہدایات کی پابندی کرتے ہیں۔ خواتین شلوار قمیص پہنتی ہیں بلکہ کچھ کو تو دوپٹہ اوڑھے ہوئے بھی دیکھا گیا ہے۔ البتہ یہ ممکن ہے کہ امدادی کارکنوں نے شلوار قمیص کی بجائے پتلون اور شرٹ کو ترجیح دی ہو کیونکہ بھاگ دوڑ کے کاموں کے لیے اس لباس میں عملی سہولت رہتی ہے۔

تاہم مذہبی رہنماؤں کو اصل اعتراض لباس کی تفصیلات پر نہیں ہے۔ محمد حسن عسکری نے ’ساقی‘ میں لکھا تھا کہ فحاشی تو ’وہ آئی، وہ گئی‘ میں سے بھی نکالی جاسکتی ہے۔

جن لوگوں کی نظر میں عورت کا وجود ہی فحاشی کے مترادف ہو، وہ بے بنیاد الزامات کا انبار لگانے سے نہیں گھبراتے۔ خاص طور پر اس لیے بھی کہ پاکستانی معاشرے میں غیرت وغیرہ جیسے طعنوں سے اشتعال پھیلانا نہایت آسان ہے۔ شاید کچھ افراد کو پاکستان کی پہلی قانون ساز اسمبلی میں وہ بحث یاد ہو جو ابو الاعلی مودودی صاحب کی ’تصنیف‘ پردہ میں سکول جانے والی بچیوں کی کردار کُشی کے حوالے سے ہوئی تھی۔

لیاقت علی خان نے ان الزامات کا مُسکت جواب دیا تھا مگر وہ کتاب آج بھی قابلِ اعتراض حصوں سمیت شائع ہوتی ہے۔

اصل مقصد عوام کے جذبات سے کھیلنا، مقامی سطح پر اپنی حیثیت مضبوط کرنا، ریاستی اداروں کو بے وقعت کرنا اور معاشرے کو یرغمالی بنانا ہے۔ مالا کنڈ اور دیر کی طرح مانسہرہ بھی جہادی گروہوں کے لیے بھرتی کا اہم مرکز سمجھا جاتا ہے۔ پیوستہ مفادات کے حامل حلقوں کو یہ خدشہ ہوسکتا ہے کہ ان پسماندہ علاقوں کے عوام میں برسوں کی محنت سے مغرب دشمنی کے جو جذبات پیدا کیئے گئے ہیں یورپ سے تعلق رکھنے والے امدادی کارکنوں کی بے لوث خدمت کے نتیجے میں ان جذبات کا گراف کہیں نیچے نہ آجائے۔

مقامی روایات کی دلیل جس قدر نازک ہے اسی قدر پیچیدہ بھی ہے۔ کیا معاشرے کے تمام طبقات میں اخلاقی اقدار پر مکمل اتفاق رائے پیدا ہونا ممکن ہے؟ ابھی تک تو طالبان نما ضابطے نافذ کرنے کی مہم ملک کے دوردراز حصوں تک محدود ہے۔ جلد یا بدیر یہ لہر اسلام آباد، لاہور اور کراچی جیسے شہروں تک بھی پہنچے گی جہاں رہن سہن، لباس اور معاشرتی اقدار میں بے پناہ تنوع پایا جاتا ہے۔ ایسی صورت میں معاشرتی خلفشار کی جو صورتیں پیدا ہوں گی، ابھی ان کا ادراک بھی مشکل ہے۔

علاقہ بدر کرنے کی غیرانسانی اور پسماندہ روایت اب تک قبائلی علاقوں میں رائج تھی لیکن اب یہ رجحان واضح طور پر بندوبستی اضلاع تک پھیل رہا ہے۔ مذکورہ مہم میں این جی او میں کام کرنے والے پاکستانی مردوں اور خواتین کو ضلع بدر کرنے کا مطالبہ کیا گیا ہے۔ اس ضمن میں کسی ملکی قانون کا حوالہ دینے کی ضرورت محسوس نہیں کی گئی۔

گزشتہ بیس برس میں پاکستان کے مذہبی عناصر اور نادیدہ قوتوں میں این جی اوز کی مخالفت پر اتفاق رہا ہے بلکہ سیاسی حکومتیں بھی غریب کی جوروسمجھ کر سول سوسائٹی کے پیچھے پڑی رہتی تھیں۔ پیپلز پارٹی کی حکومت میں این جی اوز پر گولہ باری کی ذمہ داری ڈاکٹر شیر افگن کے سپرد تھی۔ مسلم لیگ حکومت میں یہ منصب گجرات کے مرحوم پیر بنیامن رضوی کو حاصل تھا۔

اخباری اطلاعات کے مطابق این جی اوز کے کارکنوں کو گاڑیوں سمیت نذرِ آتش کرنے کی دھمکی تک دی گئی ہے۔ ان دھمکیوں کے پیشِ نظر ضلعی انتظامیہ اور صوبائی حکومت کا ردّ عمل دلچسپ ہے۔ ایبٹ آباد میں ضلعی انتظامیہ نے اشتعال پھیلانے والے عناصر کو قابو میں کرنے کی بجائے امدادی اداروں پر پابندیاں لگانے کی کوشش کی ہے۔ صوبائی حکومت نے ایک کمیٹی قائم کرنے کا فیصلہ کیا جس میں مذہبیی رہنماؤں ، فوجی افسروں اور امدادی اداروں کے کارکنوں کو شامل کیا گیا ہے۔ یہ کمیٹی امدادی کارکنوں کے لیے لباس کے قواعدوضوابط طے کرے گی۔ اُمید کرنی چاہیئے کہ کمیٹی کی سفارشات میں عورتوں کے لیے طالبان والا شٹل کاک برقعہ تجویز نہیں کیا جائے گا۔ ورنہ جگ ہنسائی کی نئی صورتیں پیدا ہوں گی۔

معلوم ہوتا ہے کہ پاکستانی حکومت روشن خیالی کے دعوؤں کے باوجود درحقیقت سیاسی اور معاشرتی ڈھانچوں سے کھلواڑ کرنے والے عناصر کے ہاتھ میں یرغمالی ہے۔

پاکستان میں زمینی صورت حال بدلے یا نہ بدلے، بہرصورت حکومت کو دنیا میں پاکستان کا نرم تاثر پیدا کرنے کی خاصی فکر ہے۔ غالب امکان ہے کہ اعتدال پسند تاثر پیدا کرنے کی ان سرکاری کوششوں کو تب بڑی تقویت ملے گی جب کٹھن حالات میں انسانی ہمدردی کے نام پر پاکستانی شہریوں کی مدد کرنے والے کارکن اپنے ملکوں میں واپس پہنچ کر سرکاری اور معاشرتی سطح پر احسان مندی اور شکرگذاری کی داستانیں بیان کریں گے۔

(وجاہت مسعود انسانی حقوق، صحافت اور تعلیم کے شعبوں میں وسیع تجربہ رکھتے ہیں۔ وہ ادبی اور سیاسی موضوعات پر متعدد کتابوں کے مصنف ہیں اور آج کل برطانیہ میں بین الاقوامی قانون کی تعلیم حاصل کر رہے ہیں)