ایم ایس احمد پٹنہ

	سیلاب کے سترہویں دن بھی لوگوں کی مشکلات میں کمی نہیں ہوئی ہے

کچھ دعوؤں کےمطابق سیلاب میں ایک لاکھ لوگ ہلاک ہوگئے جبکہ سرکاری اعداد و شمار کے مطابق ہلاک ہونے والوں کی تعداد سو سے زیادہ نہیں ہے۔

بہار میں سیلاب کی تباہ کاریاں، تصاویر

حکومت مرنے والوں کی تعداد لاشیں گن کرمتعین کرتی ہے۔

ہلاکتوں کے بارے میں اس قدر تضاد اس لیے ہے کہ کسی کو کچھ نہیں پتہ کہ کتنے افراد حقیقتاً کوسی کی دھار میں بہہ کر اپنی جان گنوا بیٹھے ہیں جن کی لاش نہیں مل سکی ان بارے میں کیا کہا جائے گمشدہ یا مردہ۔ جبکہ حکومت تو لاش گن کر ہلاکتوں کی تعداد متعین کرتی ہے

گوکرن چودھری کے گھر والوں نے آنندی کی لاش نہ ملنے کے بعد تسلیم کر لیا ہے کہ آنندی کی موت ہو چکی ہے۔ آنندی کی روح کی شانتی کے لیے ضروری تھا کہ ان کی آخری رسومات ادا کی جائیں۔ اس لیے گوکرن اور ان کے بھائی شیوشنکر چودھری نے پتلا بنا کر اپنی ماں کو نذر آتش کیا۔

ہندو مذہب کو جاننے والوں کے مطابق لاش نہ ملنے کی صورت میں ایک قسم کے گھاس اور دھان کے لمبے تنکے سے پُتلا بنا کر اسے ہی لاش مان کر آخری رسومات ادا کی جاتی ہیں۔

	سیلاب کی وجہ سے بزرگ سب سے زیادہ متاثر ہوئے ہیں

گوکرن نے اپنی آنکھوں کے سامنے دیکھ لیا کہ ان کی ماں ندی کی دھار میں بہ گئی ہیں لیکن بہت سے افراد کسی کی نظر میں آئے بغیر بہہ گئے۔ ان کے عزیز و اقارب انہیں فی الحال مرا ہوا تصور کر رہے ہیں۔

سہرسہ کے ایک کالج میں پناہ لیے نیپال کی ارمیلا دیوی بھی کوسی کے سیلاب میں بہہ گئی تھیں۔ اس کے بعد وہ یہاں کیسے پہنچیں انہیں نہیں معلوم لیکن ان کے ساتھ بہہ جانے والے تین بچوں کا پتہ نہیں چلا۔ ارمیلا کے خدشے کا اندازہ آسانی سے لگایا جا سکتا ہے۔

ایسے گوکرن اور ارمیلا ہر ریلیف کیمپ میں مل جائیں گے۔