ریاض مسرور بی بی سی اردو ڈاٹ کام، سرینگر

	یو این مارچ کے دوران علیحدگی پسند گروپوں کے قائدین مشترکہ طور پر شریک ہو‏ئے ہیں

علحیدگی پسند لیڈر میر وا‏عظ عمر فاروق نے یہ بات سرینگر میں اقوام متحدہ یعنی یو این کے فوجی مبصرین کے دفتر کے باہر وادی کے مختلف شہروں سے جمع ہوئے لاکھوں لوگوں کے اجتماع سے خطاب کے دوران کہی ہے۔

اجتماع کو خطاب کرتے ہوئے حریت لیڈر میر واعظ عمر فاروق نے کہا’ اقوام متحدہ کشمیریوں کے حق خود ارادیت کے لیے براہ راست مداخلت کرے اور رائے شماری کے راستے کو ہموار کرے۔‘

واضح رہے کہ پیر کو لاکھوں لوگوں نے وادی کے مختلف شہروں سے جمع ہوکر اقوام متحدہ کے سرینگر کے دفتر کے باہر پر امن مارچ کیا ہے اور قرارداد پیش کیں۔

اس موقع پر ایک دیگر علیحدگی پسند لیڈر سید علی شاہ گیلانی نے اجتماع کو خطاب کرتے ہوئے اقوام متحدہ سے مطالبہ کیا کہ کشمیر میں امن فوج تعینات کیا جائے۔

گیلانی کا کہنا تھا کہ’چونکہ وادی اور جموں ميں مسلمان محفوظ نہیں ہیں اس لیے ان خطوں میں اقوام متحدہ غیر جانب دار فوج یعنی امن فوج تعیانت کرے۔‘

اس اجتماع میں علیحدگی پسند گروپوں کے قائدین مشترکہ طور پر شریک ہو‏ئے۔ تاہم شبیر شاہ اور یسین ملک نے اجتماع سے خطاب نہیں کیا۔

’یواین مارچ‘ کی یہ کال اتوار کو حریت رہنماؤں سید علی گیلانی، میرواعظ عمر فاروق، شبیر احمد شاہ نے مشترکہ طور پر دی تھی۔

اقوام متحدہ کی مداخلت کا یہ اجتماعی مطالبہ گیارہ اگست کو شروع کی گئی ’مظفرآباد چلو‘ تحریک کے سبب ہوا ہے۔ یہ تحریک جموں کے بعض ہندو انتہا پسند گروپوں کی طرف سے کشمیریوں اور جموں کی مسلم آبادیوں کی ناکہ بندی کے خلاف شروع کی گئی تھی۔