بینو جوشی بی بی سی، جموں

	جموں شہر ميں کرفیوں ميں نرمی نہيں دی گئی ہے لیکن احتجاج ابھی بھی جاری ہے

واضح رہے کہ سنیچر کی صبح وزیر داخلہ شیوراج پاٹل کی سربراہی میں اٹھارہ سیاسی جماعتوں کا ایک وفد سنگھرش سمیتی کے اہلکاروں سے مذاکرات کے لیے جموں پہنچا تھا لیکن سمیتی نے وفد میں پیپلز ڈیموکریٹک پارٹی کی صدر محبوبہ مفتی، نیشنل کانفرنس کے سرپرست فاروق عبداللہ اور کانگریس پارٹی کے رہنما سیف الدین سوز کی موجودگی کے سبب بات چیت کرنے سے انکار کر دیا تھا۔

سنگھرش سمیتی کا کہنا تھا کہ یہی رہمنا زمین تنازعہ کے لیے ذمہ دار ہيں اس لیے ان رہمناؤں کی شراکت والے وفد سے مذاکرات کرنا ممکن نہیں ہے۔

بعد ازاں سنگھرش سمیتی کے اس رویے کے پیش نظر پیپلز ڈیموکریٹک پارٹی کی رہمنا محبوبہ مفتی نے کہا کہ اگر وہ ایسا چاہتے ہيں تو کشمیری رہمنا اس بات چیت میں شامل نہيں ہوں گے۔ محبوبہ مفتی کے اس بیان کے بعد سنگھرش سمیتی کل جماعتی وفد سے مذاکرات کرنے کے لیے راضی ہوگي۔ بات چیت ابھی ابتدائي مرحلے میں ہے۔

سنیچر کی صبح کل جماعتی وفد نے جموں پہنچنے کے بعد جموں راج بھون ميں گورنر این این ووہرا سے بات چیت کی تھی۔

	گزشتہ بدھ کو وزیر اعظم کی رہائش گاہ پر امرناتھ زمین تنازعہ کے حل کے لیے ایک کل جماعتی میٹنگ ہوئی تھی

واضح رہے کہ گزشتہ بدھ کو وزیر اعظم کی رہائش گاہ پر امرناتھ زمین تنازعہ کے حل کے لیے ایک کل جماعتی میٹنگ ہوئی تھی جس میں ایک کل جماعتی وفد جموں اور کشمیر بھیجنے کا فیصلہ کیا گيا تھا۔

ادھر اٹھارہ سیاسی جماعتوں پر مشتمل وفد کے جموں پہنچنے سے قبل سنگھرش سمیتی نے زمین کے حصول کے لیے احتجاج کی مدت 14 اگست تک بڑھانے کا اعلان کیا تھا۔ سنگھرش سیمتی جموں ميں کئی ہفتوں سے مسلسل احتجاج کر رہی ہے۔

سنگھرش سمیتی کا کہنا رہا ہے کہ مذاکرات سے متعلق انہيں کوئی اعتراض نہيں ہے، لیکن زمین کی واپسی کے مطالبے کو ترک کر دینے جیسے معاہدے قابل قبول نہیں ہوں گے۔

واضح رہے کہ امرناتھ شرائن بورڈ زمین تنازعے کے سبب ہندو اکثریت والے جموں اور مسلم اکثریت والے خطے کشمیر میں مظاہروں کے سبب اب تک متعدد افراد ہلاک اور سینکڑوں زخمی ہوئے ہیں۔

امرناتھ سنگھرش سمیتی تقریباً تیس سماجی اور مذہبی تنظیموں کا سنگم ہے۔اس تنظیم میں بھاریتہ جنتا پارٹی بھی شامل ہے۔ ان کا مقصد شرائن بورڈ سے واپس لی گئی زمین کو دوبارہ حاصل کرنا ہے۔