یہ پچھلے کچھ سالوں میں ہونے والے سب سے بڑے مظاہرے ہیں

ادھر اس فیصلے کے خلاف بعض ہندو نظریاتی تنظیموں سمیت کچھ سماجی تنظیموں نے ہندو اکثریتی صوبہ جموں میں ہڑتال کی اور جلوس نکالے۔

کشمیر میں ہونے والے ان احتجاجی مظاہروں میں اب تک چار افراد ہلاک اور سینکڑوں زخمی ہوئے ہیں۔ پچھلے کچھ سالوں کے دوران ہونے والے یہ سب سے بڑے مظاہرے ہیں اور نامہ نگاروں کا کہنا ہے کہ زمین کی منتقلی کے خلاف شروع ہونے والی تحریک اب کشمیر کی آزادی کی تحریک میں بدلتی نظر آ رہی ہے۔

سرینگر میں بی بی سی کے نامہ نگار الطاف حسین کے مطابق وادی میں پیر کو بھی دکانیں، بینک، سکول اور دیگر سرکاری دفاتر بند رہے جبکہ سڑکوں پر ٹریفک نہ ہونے کے برابر تھا۔

سرحدی شہر بارامُلہ میں پولیس نے مظاہرین کو منتشر کرنے کے لیے آنسو گیس کا استعمال کیا۔ سرینگر میں علیحدگی پسند رہنما سید علی شاہ گیلانی نے پرانے شہر میں ایک بہت بڑے احتجاجی مظاہرے کی قیادت کی۔

اسی دوران جموں صوبے کے ہندو اکثریتی علاقوں میں بی جے پی کی کال پر ہڑتال کی گئی۔ بی جے پی کے ساتھ ساتھ شِو سینا اور وشوو ہندو پریشد جیسی دیگر سخت گیر ہندو جماعتوں کے ارکان نے جموں کشمیر کے نئے گورنر این این ووہرا اور وزیر اعلی غلام نبی آزاد کے خلاف نعرہ بازی کی۔

	مظاہروں کا سلسلہ پچھلے آٹھ دن سے جاری ہے

اتوار کو ریاستی حکومت نے امرناتھ شرائن بورڈ کو زمین منتقل کرنے کا فیصلہ واپس لینے کا اعلان کیا تھا۔ حکومت کا کہنا تھا کہ امرناتھ یاترا کے لیے آنے والے زائرین کو تمام سہولیات خود حکومت فراہم کرے گی۔

اس سے پہلے حکومت کا موقف تھا کہ یہ زمین زائیرین کے لیے پہلے سے تیار کردہ جھونپڑیاں اور بیت الخلا بنانے کے لیے استعمال کی جائے گی۔

علیحدگی پسند تنظیموں کا کہنا ہے کہ یہ ’کشمیر میں غیر کشمیری ہندؤوں کو بسا کر یہاں کے مسلم اکثریتی کردار کو ختم کرنے کی سازش کا حصہ ہے۔‘

مقامی ماہرین ماحولیات نے بھی اس فیصلے کی مخالفت کی تھی۔

زمین کی منتقلی کے خلاف بڑے پیمانے پر ہونے والے یہ مظاہرے لوگوں کو اُنیس سو نوے کی یاد دلا رہے ہیں۔