ریاض مسرور بی بی سی ، اُردو ڈاٹ کام، سرینگر

	احتجاج کے دوران پولیس نے لاٹھی چارج کیا اور آنسوگیس کے گولے داغے

ان جھڑپوں میں لبریشن فرنٹ رہنما محمد یٰسین ملک سمیت کئی افراد زخمی ہوگئے۔

اس دوران ہفتے کو مشتعل نوجوانوں نے سرینگر کے گھنٹہ گھر پر سبز ہلالی پرچم لہرانے کے بعد اسے کئی مقامات پر سرکاری املاک پر لہرانا چاہا ،جس پر پولیس نے لاٹھی چارج کیا اور اشک آور گیس کے گولے داغے ۔

عینی شاہدین کا کہنا ہے کہ پائین شہر اور نواحی علاقوں میں مختلف مقامات پر پولیس نے مشتعل ہجوم پر قابو پانے کے لیے راست فائرنگ کی جس کے نتیجہ میں کئی افراد زخمی ہوگئے جن میں سے کچھ کی حالت نازک بتائی جاتی ہے۔

سرینگر اور پوری وادی میں پرتشدد مظاہروں کے درمیان پاکستان کے پانچ روزہ دورے سے لوٹے علیٰحدگی پسند رہنما میرواعظ عمرفاروق نے ایک پریس کانفرنس میں اعلان کیا ’شرائن بورڑ کو آٹھ سو کنال اراضی کی منتقلی کا سرکاری حکم نامہ منسوخ کیے جانے تک احتجاج جاری رہے گا۔‘

ان کا کہنا تھا کہ موجودہ احتجاجی تحریک لوگوں یا کسی مخصوص سیاسی نظریئے کی حمایت میں نہیں بلکہ آزادانہ ایک اجتماعی سوچ کے ساتھ سڑکوں پر اتر آئے ہیں۔’اگر حکومت نے فی الفور زمین کی منتقلی کا آرڈر واپس نہیں لیا تو حالات بے قابو ہوجائینگے۔‘

	جھڑپوں میں لبریشن فرنٹ رہنما محمد یٰسین ملک سمیت کئی افراد زخمی ہوگئے

اس دوران پوری وادی میں عام زندگی ٹھپ ہے، اور سیاحوں کی بڑی تعداد واپس جارہی ہے۔ تاہم علیٰحدگی پسند قیادت نے اپنا یہ اعلان دہرایا ہے کہ موجودہ احتجاجی تحریک یاترا یا یاتریوں کے خلاف نہیں ہے۔

میرواعظ عمر، سید علی گیلانی اور محمد یٰسین ملک نے اپنے الگ الگ بیانات میں کہا ہے ’یاترا کوئی نئی بات نہیں ہے۔ یہاں ڈیڑھ سو سال سے یاترا ہورہی ہے، اور مسلم آبادی یاتریوں کو تعاون دیتی رہی ہے۔ لیکن ہم لوگ زمین کی منتقلی کے خلاف ہیں، کیونکہ یہ عمل کشمیریوں کو اپنی زمینوں سے بے دخل کئے جانے کے عمل کا تاثر دیتا ہے۔‘