سوشیل کمار جھا بی بی سی، لدھیانہ

	صوفی بزرگ خواجہ معین الدین چشتی کی درگاہ کے احاطے میں جمعرات کو دھماکہ ہوا تھا

پیر کو ریاست کے وزیراعلیٰ پر کاش سنگھ بادل نے جائے وقوعہ کا دورہ کیا۔ ان کا کہنا تھا کہ ’یہ دھماکہ ریاست میں امن و امان کو نقصان پہنچانے کے لیے کیا گيا ہے‘۔

لدھیانہ بم دھماکے: تصاویر

اتوار کو ہونے والے بم دھماکے میں چھ افراد ہلاک جبکہ پینتیس زخمی
ہوئے ہیں۔ تاحال پولیس نے اس دھماکے کے لیے کسی کو ذمہ دار نہیں ٹھرایا ہے اور نہ ہی کسی شدت پسند تنظیم نے اس کی ذمہ داری لی ہے۔ زخمیوں میں بعض کی حالت نازک بتائی جاتی ہے۔

پنجاب پولیس کے ایک اعلیٰ اہلکار این پی ایس آلکھ کا کہنا ہے کہ یہ دھماکے بظاہر دہشت گردی کی کارروائی ہے۔ مسٹر آلکھ نے بتایا کہ حفاظتی دستوں کو چوکس رہنے کے احکامات جاری کیے گئے ہیں۔ دھماکوں کی نوعیت جاننے کے لیے فورنسک کے ماہرین جائے وقوعہ پر پہنچ چکے ہیں۔

ریاستی کانگریس کے صدر مہندر سنگھ کے پی نے لدھیانہ میں ایک اخباری کانفرنس میں الزام لگایا کہ ’ریاستی حکومت کی غفلت کی وجہ سے دہشت گرد کامیاب ہوئے‘ ۔ان کا کہنا تھا کہ’اب حکومت کو اس کا سختی سے مقابلہ کرنا چاہیے تاکہ پنجاب میں شدت پسند تحریک کو دوبارہ ہوا نہ مل سکے‘۔

ریاست کے وزیراعلیٰ پرکاش سنگھ بادل کا کہنا تھا کہ ریاست میں شدت پسندی کو دوبارہ پنپنے نہیں دیا جائے گا۔

یہ دھماکہ ’شنگار‘ نامی ایک سنیما گھر میں ہوا تھا جہاں بھوجپوری زبان کی ایک فلم ’جنم جنم کے ساتھ‘ دکھائی جارہی تھی۔ سنیماہال میں چھ سو پچاس افراد کے بیٹھنے کا انتظام ہے اور جس وقت یہ دھماکہ ہوا عید کی وجہ سے کافی رش تھا اور سنیماہال کے احاطے میں تقریباً ایک ہزار افراد موجود تھے۔ اس دھماکے کا نشانہ بننے والوں میں اکثریت بہاری اور مشرقی اترپردیش کے مزدورں کی ہے۔

وزیراعظم منوہن سنگھ نے دھماکے پر افسوس کا اظہار کرتے ہوئے لواحقین کے ورثاء کو ایک ایک لاکھ روپے اور زخمیوں کے لیے پچاس ہزار روپے بطور معاوضہ دینے کا اعلان کیا ہے۔

لدھیانہ میں ہونے والے دھماکے سے قبل جمعرات کو اجمیر میں صوفی بزرگ خواجہ معین الدین چشتی کی درگاہ کے احاطے میں بھی ایک بم دھماکہ ہوا تھا جس میں تین افراد ہلاک جبکہ ایک درجن سے زائد زخمی ہوگئے تھے۔

واضح رہے کہ ہندوستان کے خفیہ ادارے انٹیلیجنس بیورو نے خبردار کیا تھا کہ شدت پسند عید کے موقع پر مذہبی مقامات پر دہشت گردی کر سکتے ہیں۔