شکیل اختر بی بی سی اردو ڈاٹ کام، دلی

	’انڈیا اور پاکستان کے درمیان بہتر تعلقات کے لیے اختلافات دور کیے جائیں‘

تیسری راؤنڈ ٹیبل کانفرنس دلی میں وزیر اعظم کی رہائش گاہ پر ہو رہی ہے۔ کشمیر کی علیحدگی پسند تنظیمیں اس کانفرنس کا بائیکاٹ کر رہی ہیں۔

مسئلہ کشمیر پر تیسرے راؤنڈ ٹیبل مذاکرات کا افتتاح کرتے ہوئے منموہن سنگھ کا کہنا تھا کہ دونوں ممالک کے درمیان بہتر تعلقات کے لیے لازمی ہے کہ اختلافات دور کیے جائیں اور عدم اعتماد کی فضا تبدیل کی جائے۔

وزیراعظم نے کہا کہ ان کی حکومت اس مقصد کے حصول کے لیے ہر ممکن قدم اٹھائے گی۔

ان کا کہنا تھا: ’ ہم پاکستان کے ساتھ بہتر تعلقات قائم کرنے اور تمام تصفیہ طلب معاملات کوحل کر نے کے لیے سنجیدہ مذاکرات کے عمل میں شامل ہیں لیکن اس طرح کی کوششیں اس وقت ہی کار آمد ثابت ہو سکتی ہیں جب دہشت گردی پر قابو پانے کے وعدے پر پوری طرح عمل کیا جائے‘۔

منموہن سنگھ نے کہا کہ جموں و کشمیر ميں شدت پسندی پر قابو پانے میں فوج اہم کردار ادا کر رہی ہے لیکن ساتھ ہی حکومت اس بات کو یقینی بنانا چاہتی ہے کہ حقوقِ انسانی کی خلاف ورزی نہ ہو اور شہریوں کو بے جا ہراساں نہ کیا جائے۔

انہوں نے کہا:’دہشت گردی نے لوگوں کے ذہن و دماغ پر گہرا اثر ڈالا ہے۔ ہماری یہ کوشش ہے کہ اس زخم کو مندمل کیا جائے اور ایک نیا آغاز ہو‘۔

منموہن سنگھ نے کہا کہ راؤنڈ ٹیبل مذاکرات سے کشمیر کے حالات بہتر بنانے میں بہت مدد ملے گی۔