سپریم کورٹ نے اس معاملے کی سماعت اگست میں رکھی تھی

مرکزی حکومت نے منگل کے دن سپریم کورٹ کے چیف جسٹس سے درخواست کی تھی کہ ’او بی سی‘ ریزرویشن کی سماعت جلدی کی جائے۔ پیر کے روز سپریم کورٹ کی ایک بینچ نے پسماندہ طبقوں کے لیے ریزرویشن کے متعلق آئندہ سماعت اس سال اگست میں رکھی تھی۔

اٹارنی جنرل ملن کے بنرجی نے چیف جسٹس کے جی بالا کرشنن کی سربراہی میں قائم ایک بینچ کے سامنے پیش ہوئے اور کہا: ’یہ معاملہ مفاد عامہ کا ہے اور اگر اس معاملے کی سماعت جلدی نہيں کی گئی تو بڑی تعداد میں طلبہ اس سال داخلے سے محروم ہو جائیں گے۔‘

حکومت نے یہ درخواست تب دی ہے جب اریجیت پسایت اور ایل ایس پٹنہ کی ایک بینچ نے پیر کے روز پسماندہ ذاتوں کے لیے اعلی تعلمی اداروں میں نشستیں مخصوص کرنے والے بِل پر پابندی کو جاری رکھنے کا حکم دیا تھا اور کہا تھا کہ رواں تعلیمی سال پسماندہ ذاتوں کو ریزرویشن سے فائدہ نہيں مل سکتا ہے۔

ریزرویشن پر عدالت کا موقف  عدالت کا کہنا تھا کہ پسماندہ ذاتوں کے لیے قابل اعتبار جائزے کی عدم موجودگی میں ریزرویشن نافذ نہیں کیا جاسکتا ہے، حکومت نے پسماندہ ذاتوں کے لیے سیٹیں مخصوص کرنے کا جو پیمانہ متعین کیا ہے اس کی بنیاد 1931 کی مردم شماری ہے جوغیرمستند ہے۔

خیال رہے کہ انتیس مارچ کو سپریم کورٹ کے ایک بینچ نے اعلی تعلیمی اداروں میں پسماندہ طبقوں کے لیے ستائیس فیصد نشستیں مخصوص کرنے کے حکومتی فیصلے پر حکم امنتاعی جاری کر دیا تھا۔

عدالت کے اس فیصلہ کے بعد مرکزی حکومت نے گزشتہ روز سپریم کورٹ میں درخواست داخل کر کے اعلی تعلمی اداروں میں پسماندہ طبقوں کے لیے ریزرویشرن پر پابندی ختم کرنے کی گزارش کی تھی۔ تاہم عدالت نے اسے مسترد کر دیا تھا۔

عدالت کا کہنا تھا کہ پسماندہ ذاتوں کے لیے قابل اعتبار جائزے کی عدم موجودگی میں ریزرویشن نافذ نہیں کیا جاسکتا ہے، حکومت نے پسماندہ ذاتوں کے لیے سیٹیں مخصوص کرنے کا جو پیمانہ متعین کیا ہے اس کی بنیاد 1931 کی مردم شماری ہے جوغیرمستند ہے۔

عدالت کا کہنا ہے کہ حکومت پہلے پسماندہ ذاتوں کے اعداد و شمار کا صحیح تعین کرے تاکہ پسماندہ ذاتوں کے زمرے میں آنے والی تمام ذاتوں کے بارے میں پوری اور مکمل معلومات حاصل کی جا سکے۔